iPhone X'даги энг инновацион жиҳат Galaxy S9'да ҳам бўлади
Яқинда тақдим қилинган ва Samsung Galaxy S9 смартфонида ўрнатиш назарда тутилган Exynos процессори Apple сўнгги флагманида татбиқ қилган технологияларни ҳам қўллаб-қувватлайди. Жумладан, Galaxy S9 смартфонида ҳам Face ID функциясида мавжуд Animoji, яъни фойдаланувчи қиёфасидаги ҳолатга қараб, унинг кайфиятини анимацияларда ифодалайдиган технологияси жорий қилинади. Бу тўғрида Корея Республикасининг Korea Herald нашри хабар тарқатмоқда.
Samsung компанияси вакилларига кўра, янги чипсет салоҳияти қиёфани танишнинг самарали фильтрларини таклиф қилади. Бу эса қурилма хавфсизлиги, унинг бегона шахслар томонидан разблокировка қилинмаслиги учун айни муддао.
Exynos 9 Series 9810 процессори — маълумотни 10 нанометрли техник жараёнда ишлайдиган чипсет бўлиб, электр қувватини тежаши билан етакчилик қилиши айтилмоқда. Фойдаланувчининг биометрик маълумотларини қайта ишлаш учун бу чипда алоҳида қисм ўрнатилади. Процессор, шунингдек, секундига 120 кадрдан иборат бўлган ҳамда тасвир барқарорлиги юқори 4К видеолар ёза олади.
Бир муддат аввал Samsung унинг янги флагманидаги технологиялар Apple ишланмаларини доғда қолдиришини маълум қилган эди. Мисол учун, Жанубий кореялик компания жаҳонда биринчи бўлиб фойдаланувчи қиёфасини танийдиган смартфон яратиш инновациясини илгари сурди.
Тўғри, бу смартфонларни сурат орқали ёки ухлаб ётган одам ёрдамида ҳам очиш мумкинлиги кўп танқид остига олинди. Бироқ, Samsung компаниясининг фикрича, бундай идентификация тизимига хавфсизликни таъминлайдиган жиҳат эмас, маркетингга хос инновация сифатида қабул қилиш керак. Animoji технологияси кўпчилик учун iPhone X'га хос энг илғор жиҳат деб қабул қилинган эди. Samsung ҳам рақибининг бу инновациясини ўзлаштиришга ва мухлисларига вақтларини мароқли ўтказишларига ёрдам беришга қарор қилган кўринади.
