iPhone X ва Galaxy S9+’нинг самарадорлик бўйича «жонли» беллашуви: кутилмаган натижа!

Айни дамда дунёдаги энг етакчи смартфонсозлар Apple ва Samsung эканлиги маълум. Хўш, уларнинг энг сўнгги флагманлари – iPhone X ва Galaxy S9+ моделларининг самарадорлиги, амалда ишлаш тезлиги қай даражада?

ЎҚИНГ: Galaxy S9 iPhone X'ни яна бир унвондан маҳрум қилди

Tom’s Guide сайти шарҳловчилари бу масалага жиддий қизиқиб қолишди ва бу икки смартфонни «жонли» тарзда, яъни амалда ишлатиб кўриб, тезлигини ўзаро таққослашди.

Аввало, синтетик тестлардаги кўрсаткичларга назар солсак. Мобил қурилмаларнинг умумий самарадорлигини баҳоловчи Geekbench 4 бенчмаркида кўп ядроли режимдаги синовда iPhone X модели 10357 балл, Galaxy S9+ эса атиги 8295 очко олган. OpenGL ES 3.0 бенчмаркида эса, Unlimited режимида купертинолик флагман 4994 балл, унинг жанубий кореялик рақиби эса 4634 балл тўплаган. Samsung флагмани фақат 3DMark Sling Shot тестидагина юбилей айфонидан юқори очко олган: тегишлича 5793 ва 3998 очко.

Хуллас, Tom’s Guide ходимлари бу икки флагманни «жонли» ҳаётдаги текширувда ўзаро солиштиришди ва натижа қизиқ чиқди. Икки дақиқалик видеофайлни Adobe Premiere Clip ёрдамида қайта кодлаш (перекодировка) учун iPhone X атиги 42 сония вақт сарфлади. Galaxy S9+’га эса айни шу вазифани бажариш учун 2 дақиқаю 32 сония керак бўлди. Шунингдек, Injustice 2 ўйинини очиш учун Apple флагманига 13 сония кифоя қилди, Galaxy S9+ эса бу ишни 20 сониядагина уддалай олди.

Буларнинг барчаси кўрсатиб турибдики, iPhone X ҳали яқиндагина тақдим этилган Galaxy S9+’га нисбатан тезроқ ишлар экан.

ЎҚИНГ: КУТИЛМАГАН ВИДЕО: Samsung Galaxy S9+ ўтган йилги хитойлик флагманга мағлуб бўлди!