LG’нинг 13 ноябрдан сотила бошланган ақлли соатида носозлик аниқланди
LG компанияси томонидан илк маротаба сотувга чиқарилган LG Watch Urbane Second Edition LTE ақлли соатининг сотувга чиқарилишидан бир ҳафта ўтиб соатда аниқланган носозлик туфайли қурилмани савдо пештахталардан қайтариб олиш бўйича қарор қабул қилинган.
Гарчи, аппаратда техник носозлик борлигини тан олаётган бўлса-да, компания вазиятга батафсил изоҳ бераётгани йўқ. 9to5google интернет нашрининг маълум қилишича, конструкция тизимларидаги камчилик уни аста-секин ишдан чиқишига сабаб бўлар экан.
Американинг телекоммуникация йўналишидаги йирик компанияларидан бири AT&T’нинг ушбу масала юзасидан эълон қилган баёнотида LG Watch Urbane 2nd Edition LTE соатини сотиб олган мижозларнинг харажатлари қопланиши ёки бошқа русумдаги смарт-соатларга алмаштириб берилиши маълум қилинган.
9to5Google нашрининг Reddit ижтимоий хабарлар сайти фойдаланувчиларидан бирининг қолдирган хабарига асосланиб ёзишича, носозлик хусусидаги эълондан кейин ҳам Verizon компанияси мазкур русумдаги ақлли соатларни сотишни тўхтатгани йўқ.
2015 йилнинг октябрь ойида намойиши ўтказилган LG Watch Urbane Second Edition маркасидаги соат Google Android томонидан ақлли соатлар учун яратилган операцион тизимда ишлайдиган илк электрон мослама ҳисобланади.
Ақлли соат 35.19 мм диагоналли дисплей, алоқани танлашга хизмат қиладиган учта ён тугмалари, LG’нинг Саломатлик иловаси, асосий ҳамда юрак уришини назорат қилувчи монитор ва спортив кўринишдаги чарм тасмага эга.
Qualcomm Snapdragon 400 процессори, 570mAh олти қиррали аккумулятор батареяси, Нано сим карта, 768MB оператив хотира, 4GB ички мусиқа хотираси, Wi-Fi, Bluetooth, GPS, 3G, ҳамда LTE технологияси ўрнатилган ақлли соат 300 АҚШ долларидан сотилаётган бўлган.
