Qualcomm Galaxy X'нинг тақдирига ойдинлик киритди
Сўнгги бир неча йиллардан буён Samsung Galaxy X деб ном олган сирли смартфон ҳақида турли миш-миш ва хабарлар юрибди. Қайишқоқ дисплейга эга бўлиши кутилган мазкур мобил алоқа воситасига оид хабарлар шу вақтга қадар ҳамманинг диққатини тортиб келаётган эди. Эгилувчан экранга эга бўлиши айтиб келинган бу девайс жиҳатларига кўра ҳар қандай смартфонни ортда қолдириши маълум қилинган. Ҳатто Samsung корпорациясининг мобил қурилмалар бўйича раҳбари Dj Koh ҳам бу девайс албатта ишлаб чиқарилишини айтган эди.
Бироқ, куни кеса Qualcomm компаниясининг топ-менежери Салман Саид журналистларга берган интервьюсида "Samsung Galaxy X" ёки диплейи букиладиган бирор бир девайсни ишлаб чиқарилишини рад этди. Унинг фикрларига кўра, бугунги технология бир неча минг маротаба букиладиган ва қайта ўз ҳолига келадиган OLED-экран яратиш учун етарли даражада ривожланмаган.
Qualcomm компаниясининг энг қиммат муҳандисларидан бири бўлган ҳамда IT-саноатининг етакчи мутахассисларидан ҳисобланган Салман Саиднинг сўзларига кўра, ҳозирги пайтда ҳеч қайси ишлаб чиқарувчи, хусусан Samsung компаниясида ҳам букланувчи экран матрицаси мавжуд эмас. Унинг прототиплари ёки хомаки намуналари мавжуд. Бироқ, улар ишлаб чиқариш учун яроқсиз. Муҳандислар бугун буклаганда синмайдиган OLED экранларни ишлаб чиқаришлари зарур.
Шу билан бирга, қайишқоқ AMOLED-экранларнинг транзисторлари ҳам муаммоли масала. Боиси, бундай экранлардаги пикселларнинг қуввати учун транзисторлар жавобгар бўлади.
Мана шу муаммолар боис ҳам Samsung Galaxy X ёки унинг бирор муқобили ҳозирча ишлаб чиқарилмаган. Экспертнинг қайд этишича, кореялик ишлаб чиқарувчи ушбу қурилмани ишлаб чиқарадиган бўлса, бошқача ёндашувдан бориши мумкин. Яъни, бунда гаджет иккита алоҳида ҳамда ромдан холи экранлар бирикмасидан таркиб топган бўлади. Бу экранлар ўртасидан букланади ва тасвирни яхлит ёки алоҳида намойиш қилади. Бундай конструкцияни ишлаб чиқариш қайишқоқ OLED-экран ишлаб чиқаришдан анча осонроқ.
