Samsung Apple’ни смартфон бозоридаги лидерликдан маҳрум қилди

Халқаро TrendForce маркетинг тадқиқотлари компанияси 2017 йилнинг I чорагида жаҳон смартфон бозоридаги ҳолат бўйича ҳисоботини эълон қилди. Ҳисобот «портлайдиган Samsung Galaxy Note 7» деган ном энди одамлар учун унут бўлгани, бу муваффақиятсиз смартфон Жанубий Кореянинг Samsung компаниясининг смартфон бозоридаги етакчилигига жиддий зарар етказмаганини исботлади.

Умумий миқёсда 2017 йилнинг илк чорагида дунёда 307 миллион дона “ақлли телефон” сотилган. Бу 2016 йилнинг сўнгги чорагига нисбатан 23 фоизга кам дегани. Таҳлиллар бу чоракда жаҳон миқёсида сотилган гаджетларнинг 26,1% фоизи кореялик IT-гигант ҳиссасига тўғри келишини кўрсатмоқда. 2016 йилнинг IV чораги билан солиштириб кўрилганида, бренднинг смартфон савдосининг ҳажми 7,6%га ошган. Бунда айнан Galaxy “J” ҳамда “S” туркумидаги смартфонлар хизмати юқори.

Унинг ашаддий рақиби бўлмиш Apple эса бу чоракдаги натижалари билан мақтана олмайди: америкалик компаниянинг жаҳон смартфон бозоридаги улуши 3,4%га камайган. Шунга қарамасдан, купертинолик гигантга “пирог”нинг салмоқли, яъни 16,9% қисми насиб қилган. Таҳлилларга кўра, бу чоракда 43 миллион дона iPhone сотилган.

Жаҳоннинг энг кўп смарфтон етказиб берувчи компаниялари учлиги Huawei билан якун топган. Сўнгги 6 ойдан бери хитойлик компания ўз ўрнини ҳеч кимга бўшатиб бераётгани йўқ. Ундан кейинги ўринларни Хитойнинг Oppo ҳамда Vivo смартфон брендлари эгаллаб турибди. LG бу гал ҳам смартфон бозоридаги кучли “6”ликдан ўрин эгаллаган.

Xiaomi компанияси натижаларига эътибор қаратсак: компания Хитой смартфон бозорида 4-ўринда турибди. Мазкур чоракда унинг маҳаллий бозордаги улуши 8.1 %га ўсган.