Samsung Apple'ни яна бир нуфузли мақомдан маҳрум қилди

Samsung Electronics компанияси 2017 йилнинг сўнгги чорагида, яъни апрел-июн ойларида кутилаётган даромади аввалги йилнинг шу даврига нисбатан 72% га ошганини маълум қилди. Натижада, кореялик IT-гигантнинг бу давр ичидаги умумий даромади $12.1 миллиардни ташкил қилади. iPhone ишлаб чиқарувчиси эса мазкур 3 ойда $10.6 миллиард доллар даромад кўрган.

The Wall Street Journal иқтисодий нашрининг ёзишича, Samsung мазкур чоракда даромад олиш бўйича Apple корпорациясини ортда қолдириб, жаҳоннинг энг сердаромад технологик компаниясига айланган.

Samsung сўнгги 3 йил ичида даромад кўриш бўйича илк маротаба Apple'ни ортда қолдирди. Samsung даромадининг асосий манбааси, яъни 60 фоизи яримўтказгичли элементлар ҳисобланади. Шу билан бирга, Galaxy S8 смартфони ва хотира карталари ҳам яхшигина фойда келтиради. 2016 йилда эса компаниянинг даромади Note 7 билан боғлиқ кўнгилсиз воқеалар туфайли кескин пасайиб кетган.

Reuters ахборот агентигининг маълум қилишича, Samsung, шунингдек хотира карталари бозорида рақиби бўлган Intel компаниясини ҳам ортда қолдирган.

Шундай бўлса ҳам, жаҳоннинг энг қудратли 49 та технологик компаниялари, жумладан Microsoft, Alphabet , IBM, Intel, Cisco Systems, Oracle ҳамда Facebook АҚШда жойлашганини унутмаслик керак. Apple фаолият кўламига кўра, жаҳоннинг 9-рақамли энг йирик бизнес субъекти.

Эслатиб ўтамиз, бир муддат аввал Samsung жаҳоннинг 1-рақамли смартфонсоз компаниясига айланиб, америкалик рақибини ортда қолдирган эди.