Samsung браузеридан бошқа бренддаги смартфонда фойдаланиш мумкин бўлди

Samsung компанияси жаҳондаги энг йирик смартфон ишлаб чиқарувчиси ҳисобланади. Шу сабабли ҳам компания томонидан ўзлаштирилган Android тизими талқини хилма-хил иловалари билан ўзига хос.

Улардан бири — Samsung Internet Browser. Кореялик гигантнинг мазкур браузеридан шу вақтга қадар фақатгина Samsung қурилмалари фойдаланувчилари фойдаланиб келишар эди.

Samsung компанияси Internet Browser браузерини бошқа моделдаги смартфонлар учун синов тариқасида март ойида Google Play Store иловалар дўконига жойлаштирган эди. Жорий ҳафтадан ушбу илова расман эълон қилинди. Компания расман бу иловани Android 5.0 Lollipop’ан кейинги операцион тизимида ишлайдиган Pixel ва Nexus туркумидаги смартфонларга мўлжалланганини эълон қилган бўлса ҳам, иловадан бошқа Андроид гаджетларда ҳам фойдаланилмоқда.

Google Chrome ва Samsung Internet Browser ўртасидаги ўхшашлик — ҳар иккаласи Google’нинг Chromium номли очиқ кодли ресурси асосида ишлаб чиқилган. Шундай бўлса ҳам, кореялик компаниянинг маҳсулоти веб-тўлов, тезкор меню, контентни блоклаш, QR-код сканери, хавфсизликни таъминлаш, ён-атрофда жойлашган объектлар ҳақида маълумот олиш каби жиҳатлари билан ўзига хосдир.