Сенсация: Google сизнинг нима чизмоқчи эканингизни олдиндан билувчи дастур яратди!
Ахборот технологиялари соҳасидаги бу гигант AutoDraw деб номланган янги график муҳаррирни тақдим этди. У фойдаланувчининг нима чизмоқчи эканлигини олдиндан аниқлаб, вариантларни тақдим этади. Компания бу ҳақда ўз блогида хабар берган.
Пресс-релизда таъкидланишича, сенсор экранда ёки сичқонча билан чизишга қийналадиганлар учун мазкур муҳаррир жуда фойдали бўлади. Сунъий онг ва машина ўрганиши технологияларига таянувчи AutoDraw’да, ҳатто энг тушунарсиз чизгиларни ҳам тизим англаб олиб, тушунарли расмга айлантириб беради.
Компания тақдим қилган видеолавҳада, фойдаланувчи бўш майдончага оддий шаклни чизаётгани, сунъий онг эса унинг нима эканини аниқлашга уринаётгани акс эттирилган. Бир лаҳза ўтар-ўтмас, жиҳозлар панелида фойдаланувчи нимани чизишга уринаётгани борасидаги тахминлар таклиф қилинади. Улар орасидан керакли вариант танланса бас – қинғир-қийшиқ чизиқлар чиройли тасвирга айланади.
Ишлаб чиқувчиларнинг маълум қилишларича, объектни англаш тезлиги ўта юқори. Бунда чизилаётган расм камида икки ёки ундан ортиқ унсурдан ташқил топган бўлиши керак. Шунингдек, профессионал рассомлар бу лойиҳа шаблонларини бойитишга ҳисса қўшиш учун ўз чизмаларини тақдим этишлари ҳам мумкин.
Мазкур лойиҳада ҳам худди Google QuickDraw тажрибасидаги технология қўлланган – унда содда чизмалардаги объектларни алгоритм 20 сонияда таниб олади. Бироқ, TechCrunch нашрининг таъкидлашича, AutoDraw’да «тажрибалар учун кўпроқ эркинлик» олиш мумкин.
