Стив Возняк: Apple энди инновацияларга қодир эмас!
Apple Computer асосчиларидан бири – Стив Вознякнинг ишонч билан таъкидлашича, IT-технологиялар соҳасида навбатдаги туб бурилишни Apple эмас, балки айнан Tesla амалга оширади. Бу хусусда AppleInsider.ru сайти хабар бермоқда.
Унинг фикрига кўра, ҳозирги Apple ҳақиқий инқилобни амалга ошириш учун ўта кексалик ва лапашанглик қилади. Tesla Motors, SpaceX ва SolarCity лойиҳалари раҳбари Илон (Элон) Маск эса, бунинг учун керакли барча хусусиятлар соҳибидир.
Шижоати ва қизиқувчанлиги Маскка белгиланган режаларига эришишда ёрдам беради, деб ўйлайди С.Возняк. «Замонавий бозордаги Apple, Google, Facebook ёки Microsoft каби иштирокчиларига қаранглар, – дейди Возняк. – Улар бу бизнесдан йироқ бўлган, ёш ва қизиқувчан кишилар томонидан яратилган. Фақат шу сабаблигина улар бозорни буткул ўзгартириб юбора олишган, деб ҳисоблайман мен».
Стивнинг фикрича, Apple’нинг ёши ва ҳозирги кўлами уни ўта ноқулай вазиятга солиб қўяди. Компаниянинг шу пайтгача тўплаган обрў-эътибори кўп йилларга етади, шунинг ўзи билангина у бирорта инқилобий нарса яратмасдан, оқим билан секингина кетавериши мумкин. Бу моделдан ҳозирда Тим Кук бемалол фойдаланяпти – унинг раҳбарлиги даврида чиқарилган биттаю битта буткул янги маҳсулот – Apple Watch ҳисобланади.
