Xiaomi Mi6 самарали ишлаш бўйича iPhone 7 билан бир хил балл тўплади
Биламизки, айни пайтда энг илғор мобил восита процессори сифатида эътироф этилаётган, 8 та “Kryo 280” ядроларига, Adreno 540 видео-картаси ва X16 LTE модемига эга Qualcomm Snapdragon 835 “электрон юракча”си ҳозирча жаҳонда фақат Galaxy S8 Android-флагманида ўрнатилган. Маълумотни 10 нанометрли техник жараёнда қайта ишлайдиган ушбу чип технологияси смартфонларда илк маротаба Quick Charge 4.0 тезкор қувват олиш тизимининг ҳам жорий қилинишига сабабчи бўлди.
Мобил қурилмаларнинг процессор имкониятлари синовдан ўтказиладиган халқаро AnTuTu бенчмаркида 11 апрел куни аниқланган Xiaomi’нинг янги флагманида ҳам Qualcomm Snapdragon 835 процессори ўрнатилгани маълум бўлган.
Xiaomi Mi6 AnTuTu бенчмаркида 170 000 балл тўплашга муваффақ бўлган. Ушбу рейтингнинг етакчилари бўлган iPhone 7 Plus ҳамда iPhone 7 эса 172 644 ва 170 124 балл тўплашган. Бир муддат аввал Samsung Galaxy S8’нинг Snapdragon 835 процессорига эга талқини ушбу имтиҳонда 162101 балл тўплаган эди. Galaxy S8’нинг Exynos 8895 процессорига эга талқини 174155 балл тўплашга эришган.
19 апрел куни тақдимоти кутилаётган Xiaomi Mi6 девайси 1920 x 1080 пикселли дисплей, 4 ГБ оператив хотира памяти, 64 ГБ доимий хотира, 12 мегапикселли бош ва 8 мегапикселли олд камералар билан таъминланиши айтилмоқда. Унинг камерасида манзарани 5 карра яқинлаштириш, яъни зум функцияси татбиқ қилинади.
Android 7.1.1 Nougat операцион тизими бошқарувида ишлаши айтилаётган Xiaomi Mi6’нинг тақдимот кунини эълон қилар экан, компания ўз баннерида “Биз 203 кун, 7 йил кутдик” деган ёзувни эълон қилган. “203 кун” деганда компания Xiaomi Mi 5s ҳамда Xiaomi Mi6 тақдимотлари ўртасидаги кунларни, “7 йил” деганда эса компания асос солинганидан бошлаб, бугунгача бўлган даврни назарда тутган.
