Хитойнинг ҳурмати энг юқори 10 та компанияси
Сўнгги ўн йилдирки, Хитойда йирик компаниялар сони кескин ошиб кетди. Улар орасида айни пайтда жаҳон бозорининг энг катта ишлаб чиқарувчиларидан ҳисобланганлари ҳам кўп. Эксперт ва иқтисодчиларнинг фикрларига кўра, бу компаниялар шу суръатда ривожланишда давом этсалар, тез орада АҚШ, Европа ҳамда бошқа ривожланган мамлакатлардаги рақобатчиларини ортда қолдирадилар.
2018 йилнинг 24 майида Хитойдаги энг нуфузи юқори, аҳоли ҳурматига сазовор IT-компаниялар рейтинги маълум қилинди. Мазкур рейтингни шакллантиришда ишлаб чиқарувчи ва хизмат кўрсатувчи компанияларнинг Хитойдаги ҳамда жаҳондаги фойдаланувчиларининг фикрлари яқиндан ўрганилди.
Reputation Institute ҳамда Racepoint Global анъанавий тадқиқот натижаларига кўра, биринчи ўринга 100 дан 72,5 балл олган Huawei компанияси муносиб кўрилган. Иккинчи ўринда эса 70,7 балл билан Haier турибди.
Айтиш керакки, Huawei компанияси "кучли ўнталик"дан жой олган смартфон ишлаб чиқарувчи ва сотувчи ягона компания. Эҳтимол, шу боис ҳам унинг нуфузи хитойликлар орасида юқори бўлса керак. Шу билан бирга, таҳлилчилар эълон қилган умумий рейтингда хитойлик ва халқаро компаниялар номлари ҳам киритилди. Унга кўра Intel 73,6 балл билан жаҳоннинг энг ҳурмати баланд компанияси деб топилган. Huawei эса иккинчи ўринга тушган.
Рейтингнинг учинчи ўрнида Google (71), кейинги ўринларда Nokia (70,4), Microsoft (69,7) каби ишлаб чиқарувчилар турибди. Apple эса бор-йўғи 69,7 балл тўплаб саккизинчи ўринда турибди.
Кўпчиликнинг фикрича, Huawei шу тахлит ривожланса, тез орада Intel салоҳиятига етиб олади.
