«Яндекс.Такси» рулда ухлаб қолишга қарши қурилма ишлаб чиқди
Ҳайдовчилар ва йўловчилар учун энг хавфли вазиятлардан бири – рулдаги кишини мудроқ босишидир. Кашфиётчилар шундай ҳолатларнинг олдини олиш учун қурилмалар ҳам ишлаб чиқишаётир.
ЎҚИНГ: STEER – рулда ухлаб қолишнинг олдини олувчи билагузук! (+видео)
«Яндекс.Такси» жамоаси ҳам рулда ухлаб қолишга қарши ўз қурилмасини ишлаб чиқди ва кеча уни Сколково шаҳридаги конференцияда намойиш этди. Ушбу гаджет ҳайдовчининг юзидаги 68 та нуқтани ҳамда унинг нигоҳи қаёққа қараётганини мунтазам кузатиб туради. Махсус алгоритм эса ҳайдовчининг диққатлилик даражасини таҳлил этиб боради. Агарда ҳайдовчи уйқусираётган бўлса ёки мудрай бошласа, тизим дарров овозли сигнал чиқаради.
Айни дамда ушбу мудрашга қарши қурилма прототиплари Москвадаги бир қатор «Яндекс.Такси» автомобилларида синовдан ўтказилмоқда. Компания уни 2019 йилнинг охиригача сервиснинг мамлакатдаги барча машиналарига ўрнатишни режалаштирган. Шунда чарчаган, уйқусираган «Яндекс.Такси» ҳайдовчилари сервиснинг иловаси орқали буюртма олишлари чекланади.
Бу ҳақда «Яндекс.Такси» операциялар директори Даниил Шулейко шундай дейди: «Лойиҳанинг асосий вазифаси – таксиларнинг хавфсизлигини сезиларли даражада ошириш ва ҳайдовчиларнинг эътиборсизлиги туфайли юзага келадиган аварияларни камайтиришдир».
ЎҚИНГ: Яндекс.Такси Москвадан Қозонгача ҳайдовчисиз ўзи борди
