Янги флагманлар кушандаси – OnePlus 3T сотувга чиқарилди

Хитойнинг OnePlus компанияси OnePlus 3T смартфонининг сотувларини бошлади. Аввал хабар берганимиздек, мазкур флагманнинг тақдимоти 15 ноябрда бўлиб ўтиши керак эди.

Ferra cайтининг маълум қилишича,  OnePlus 3T жорий йилнинг июнь ойида глобал намойиши ўтказилган OnePlus 3 моделининг кучайтирилган версияси ҳисобланади. Мисол учун, OnePlus 3T кучли процессор, янада йирикроқ сиғимли батарея ва 16 МПгача оширилган селфи камера билан жиҳозланган.

Модель бугундан бошлаб АҚШ ва Канадада, 28 ноябрда эса Европа давлатлари ва Гонгконгда сотувга чиқарилади.

OnePlus 3T 5,5 дюймли Full HD aниқлигидаги Optic AMOLED дисплей, (2.5D-шишали Corning Gorilla Glass 4 билан), 16 МПли диафрагмаси f/2.0 бўлган асосий Sony IMX298 сенсор, 16 МПли олд ва бармоқ изи сканери билан таъминланган. У сиғими 3400 мА/ст бўлган  Dash Charge тезкор зарядлаш технологиясига эга батареядан қувватланади.

Қурилма Qualcomm Snapdragon 821 процессорида ишлайди, унга 6 ГБ тезкор ва 64/128 ГБ доимий хотира ўрнатилган. Операцион тизими –   Android 6.0.1 Marshmallow асосидаги Oxygen OS.

OnePlus 3T нархи 64 ГБли версия учун АҚШда 439 долларни ташкил этади. 128 ГБли версия эса 479 долларга таклиф қилинади.