Янги турдаги вирус ҳатто смартфонни портлатишга қодир!
«Касперский лабораторияси» мутахассислари мобил троян дастурлари орасида ҳақиқий «терминатор»ни пайқаб қолишди. Loapi деб номланган бу вирус тизимга ва қурилмага зарар келтирувчи ҳаракатларнинг ҳар хил турларини амалга ошира олади.
ЎҚИНГ: Кибер-вируслардан ҳимояланиш учун 4 тавсия
Loapi дастури реклама кампанияси ёрдамида тарқатиляпти – бу рекламаларда уни махсус сайтдан кўчириб олиш таклиф этилади. Бунақа ресурслардан ҳозиргача йигирмага яқини аниқланган бўлиб, бу сайтлар антивирус дастурлари кўринишида, шунингдек «катта ёшлиларга мўлжалланган» сайт тарзида ниқобланган. У ердан кўчириб олинадиган троян вируси эса мобил қурилмани ҳимояловчи ёки катталарга мўлжалланган илова ниқобида бўлади.
ЎҚИНГ: Троян-вирус бир миллионга яқин Android смартфонга зарар етказди
Қурилмаган ўрнатилганидан кейин Loapi маъмур ҳуқуқини талаб этади, буни рад этишнинг иложи ҳам бўлмайди – вирус шунчаки бошқа опцияни танлашга имкон қолдирмайди.
Маъмур ҳуқуқини қўлга киритган вирус кейин ўз модулларини фаоллаштира бошлайди. Loapi модуллари амалга оширадиган ҳужумлар шу қадар кўп ва хилма-хилки, натижада смартфон ёки планшет бошқарувини у тўлиғича ўз қўлига олади. Агарда гаджетнинг эгаси Loapi иловасидан маъмур ҳуқуқини олиб қўйишга уринса, у созламалар ойнасини ёпади ва қурилма экранини блоклайди.
Булардан ташқари, Loapi смартфондаги антивирусларни излаб топади ва уларни ўчириб ташлашни талаб этади. Мазкур троян ўчириб ташлаш талабини қайта-қайта экранга чиқараверади ва охири фойдаланувчи безор бўлиб, антивирусни ўчириб ташлайди.
ЎҚИНГ: Android учун бепул антивируслар
Ва ниҳоят, энг хавфлисига навбат келди. Мутахассисларнинг аниқлашларича, Loapi’нинг трафикни сарфловчи ва бошқа модуллари смартфон ресурсларини ва қувватини шу қадар кўп ва тинимсиз сарфлайдики, натижада тизимнинг ишлаши оғирлашиб қолади ва икки кунда аккумулятор шишиб, портлаб кетиши мумкин.
Айни дамгача «Касперский лабораторияси» мутахассислари Loapi вирусининг ҳужуми бўйича 45 мингдан ошиқ ҳолатларни аниқлаган. Сиз ҳам бу трояннинг қурбонига айланмаслик учун, эҳтиёт чораларини кўриб боришингиз тавсия этилади.
