Facebook ижтимоий тармоқ бўйича қидирув кўламини кенгайтирди
Facebook компанияси ижтимоий тармоқ бўйлаб қидирув имкониятларини кенгайтириш тўғрисида маълум қилди. Эндиликда қидирув кўлами фойдаланувчилар томонидан эълон қилинган 2 трлн хабарни қамраб олади. Бу ҳақда компания матбуот хизмати хабар берди.
Бугун, 23 октябрдан тақдим этилган янги имконият шарофати билан қидирувлар нафақат ёқтирган саҳифалар ва дўстлар профили, балки ижтимоий тармоқда эълон қилинган барча хабарлар бўйича амалга оширилади.
“Биз ижтимоий тармоқ қидирув тизимини ўзгартирдик, энди фойдаланувчилар ўзларини қизиқтирган мавзуда нафақат дўстлари ва оила аъзолари, балки бутун дунё нима деб ўйлашини билиб олишлари мумкин”, – дейилади хабарда.
Қайд этилишича, янги қидирув бугундан АҚШдаги фойдаланувчилар учун тақдим этилади.
