Firefox’да энди овоз ва видеонинг автоматик янграшини ўчириб қўя оласиз
Айрим сайтларга жойланган овозли ва видео файллар ўз-ўзидан ижро этилиб кетиши фойдаланувчиларга ҳамишаям маъқул келавермайди. Уларни чеклаб қўйиш функцияси Chrome ҳамда Safari каби браузерларда бор эди, энди оммабоп Firefox браузерига ҳам татбиқ этилмоқда.
ЎҚИНГ: Chrome, Opera ва Firefox’да сайтларнинг қалқиб чиқувчи билдиришномаларини ўчирамиз
Ҳозирча ушбу функция браузернинг синов талқини – Firefox Nightly дастурида ишламоқда, уни мана бу ердан юклаб олишингиз мумкин. Mozilla компаниясининг ваъда беришича, барқарор Firefox’га мазкур имконият октябрда жорий этилади.
Firefox Nightly орқали бирор сайтни очганда, ундаги овозли видеолавҳалар автоматик ижро этилиши мумкинлиги ҳақида браузер дарҳол фойдаланувчидан сўрайди. Шунингдек, браузер созламаларига кириб, аудио ва видео файлларнинг автоматик янграшини барча сайтлар учун бирйўла чеклаб қўйиш ҳам мумкин.
Табиийки, автоматик ижронинг блокланиши фойдаланувчилар учун интернетдан фойдаланишни қулайлаштиради. Аммо ташрифчиларга рекламани кўрсатиш эвазига даромад оладиган сайтлар учун бу янгилик асло манфаатли бўлмайди.
