GoPro Karma номли ихчам дронни намойиш этди
Куни кеча машҳур GoPro компанияси Karma номли ихчам, йиғиладиган дронни тақдим этди. Дрон йиғиладиган конструкцияга эга бўлгани учун уни кичкина кейсга жойлаштириш мумкин.
Karma жуда содда бошқариш тизими билан таъминланган: қурилмани ишга тушириш ва қўндириш битта тугма билан бажарилади. Бошқариш пульти букиладиган конструкцияда қилинган бўлиб, сенсорли экран ва тугмали джойстикдан ташкил топган. Ҳозирча бир марта тўлиқ зарядланишда дрон қанча вақт фаол бўлиши тўғрисида маълумот берилмаган.
Дронга компанияга қарашли бир қатор экшн-камераларни, масалан, янги Hero5 Black ва Session, Hero5, Hero4 ва Hero3 моделларини ўрнатиш мумкин. Дрон учта таянчли камерани ўрнатиш стабилизаторига эга. Уни дрондан ечиш ва қурилмадан алоҳида фойдаланиш мумкин.
Дроннинг стандарт камерасиз версияси 799 долларга баҳоланган. Дрон учун камера харид қилиш учун яна 200-300 доллар атрофида маблағ сарфлаш талаб этилади.
