Haier Ўзбекистонда икки барабанли кир ювиш машинасининг сотувини бошлайди

Куни кеча Хитойнинг Haier компаниясининг Facebook ижтимоий тармоғидаги Haier Uzbekistan саҳифасида иккита барабанга эга кир ювиш машинаси ҳақида пост қолдирилган.  Хабарда икки барабанли Haier Duo HW120-B1558 кир ювиш машиналарининг тавсифи келтирилган.

Кир ювиш машинасида 4 кг ва 8 кг сиғимли барабанлар мавжуд бўлиб, уларнинг ҳар бирига алоҳида кир ювиш режимларини ўрнатиш мумкин. Бундай технология, айниқса, бир неча газлама туридаги нарсаларни ювишда қулайлик беради.

Юқоридаги барабан учун 13 та кир ювиш режимлари кўзда тутилган, пастдагисида эса 19 та режим мавжуд. Маиший техника воситасида “Антиаллерген режим”,  “Болалар кийими” ва “Чақалоқлар кийими” каби алоҳида режимлар ҳам бор.

Бундан ташқари, кир ювиш машинасидаги сенсорли экранда жараённи болалардан ҳимоя қилиш функция ҳам татбиқ этилган. Ушбу функция болаларнинг ўрнатилган ювиш режимларини ўзгартиришига йўл қўймайди.

Кир ювиш машинасини пойтахт маиший техника бозорларидан харид қилиш мумкин.