Паркинсон касалига чалинганлар учун махсус қўлқоп
Лондон Империя коллежи(Imperial College London) ихтирочилари жамоаси Паркинсон касалига чалинган беморлар учун миниатурали гироскопдан тайёрланган GyroGlove номли махсус қўлқоп ишлаб чиқди. У билан қўлда исталган нарсаларни маҳкам тутиш мумкин.
Паркинсон касаллиги — асабга оид касаллик бўлиб, дунёда ҳар 500 нафар одамнинг бири унга чалинади. Касаллик инсоннинг фаол ҳаракатига жавобгар бўлган асаб тўқималарининг “ўлиши” билан бошланади. Натижада доимий ҳаракатланиш ва мушаклар тонуси бузилади, тремор пайдо бўлади, организмнинг умумий ҳаракатлари чекланади, қалтироқ юзага келади.
GyroGlove қўлқопи қўлларнинг қалтироғини тўхтатади. Яъни гироскоп беморнинг қўл титроғига қаршилик кўрсатади. Қўлқоп газлама материалдан ишланган. Унинг юқори қисмига пластик корпусга эга миниатурали гироскоп ўрнатилган. Қурилма батарейкада ишлайди. Қўлқоп фаоллашгани ҳамоно, гироскоп айланишни бошлайди. Унга махсус айланувчан механизм созланган бўлиб, митти чип ёрдамида бошқарилади.
Синовлар шуни кўрсатдики, қўлқоп треморни қарийб 90% фоизга қисқартирган. Гаджетдан фойдаланган беморларнинг фикрича, қўлқоп тақилган пайтда ҳаракатларга таъсир қилмаган, қўлни меъёрда тутиб турган. Титроқларни ҳам секинлатган.
Cure Parkinson’s Trust ассоциацияси вакили, лойиҳа раҳбари Ҳелен Мэттью(Helen Matthew)нинг қайд этишича, “GyroGlove қўлқопи Паркинсон касалига чалинган беморларга кундалик турмушда зарур бўлган юмушлар, масалан, компьютердан фойдаланиш, ёзиш, овқат тайёрлаш ва ҳатто автомобиль бошқариш имконини беради”.
Лойиҳа гуруҳи интерактив қўлқопни жорий йилнинг сентябрь ойида Британияда савдога чиқаришни режалаштирмоқда. Нархи, таҳминан, $550 – $850 атрофида бўлиши мумкин.
Мутахассислар келажакда лойиҳани янада такомиллаштириб, нафақат қўлнинг тремори, балки оёқлар қалтирашига қарши мослама ишлаб чиқишни ҳам мақсад қилишган.
