Prisma иловасини Facebook’дан тўғридан-тўғри юклаб олиш мумкин бўлади

Россиялик дастурчилар томонидан яратилган оммабоп Prisma иловасини келгусида Facebook тармоғидан тўғридан-тўғри юклаб олиш имконияти пайдо бўлади. Эндиликда Prisma орқали олинган ва Facebook’ка жойланган фото остида  “Install” (Ўрнатиш) тугмаси кўрсатилади ва исталган фойдаланувчи бевосита ижтимоий тармоқдан иловани юклаб олиши мумкин бўлади. Бу борада лойиҳа ментори сифатида фаолият кўрсатаётган Gagarin Capital компаниясининг таъсисчиларидан бири бўлган Николай Давидов сўзлаб берган.

Давидовнинг айтишича, Facebook билан бу каби интеграцияга дунёда биринчи маротаба қўл урилмоқда. Аввалроқ Давидов Facebook томонидан харид қилинган MSQRD лойиҳасининг ментори сифатида ишлаб келган.

Prisma иловаси Ван Гог, Пикассо ва Левитан каби машҳур рассомлар услубида расмларни қайта ишлаш учун нейротармоқлардан кенг фойдаланади. Илованинг iOS платформасига мўлжалланган версияси 2016 йилнинг 11 июнида чиқарилган. Android версияси эса июль ойининг сўнгида Google Play’га жойланган. Илова жуда тез фойдаланувчилар орасида оммалашган. Хизматнинг Telegram боти ҳам ишга туширилган.