Рақобатчиларимиз ташвишланаётган бўлишса ажабмас! - Дуров

Telegram ишга туширилганидан бери Павел Дуров уни биринчиликка олиб чиқишга ҳаракат қилади ва эҳтимол, бунга оз қолди. Маълум бўлишича, Telegram мессенжерлар бозорида аллақачон иккинчи ўринга чиқиб олган.

Павел Дуров ўзининг Telegram каналида Fortune журналидан олинган маълумотларни улашди. Унга кўра, Telegram Meta компаниясининг Facebook Messenger иловасидан ўзиб кетиб, мессенжерлар бозоридаги иккинчи рақам ўринга чиқиб олган.

"Сўнгги 5 йилда, Telegram Facebook Messenger'ни ортда қолдириб, энг машҳур булутли хабар алмашиш иловасига айланди. Энди Telegram фақат WhatsApp'дан кейинги иккинчи ўринда туради ва орадаги бўшлиқ йилдан йилга ёпилмоқда. Рақобатчиларимиз ташвишланаётган бўлишса ажабмас!", – дейди Дуров.

Apptopia маълумотларига асосланиб тайёрланган диаграммага қарайдиган бўлсак, 2022 йил декабр ойи ҳолатига кўра, Telegram мессенжерлар бозорида 31% улушга эга. Meta компаниясининг икки хизматлари: Facebook Messenger ва WhatsApp эса мос равишда 21% ва 44% улуш билан бозорни эгаллаб турибди. Шунингдек, диаграмманинг энг пастида 3% бозор улуши билан Signal мессенжери ҳам бор эканлигини кўришимиз мумкин.

ЎҚИНГ: Энди Instagram'да "галочка" олиш ва "рекка чиқиш" учун пулли обунага эга бўлсангиз бас!