Samsung Galaxy Note7 зарядлаш вақтида ёниб кетди
Шу ойнинг бошида тақдим этилган Samsung компаниясининг Galaxy Note7 фаблети зарядлаш пайтида ёниб кетди. Ёнган фаблетнинг сурати Хитойнинг Baidu ресурсида чоп этилган.
Фаблет эгаси уни силикон ғилофда, USB-microUSB кабели ва USB Type-C коннектори ёрдамида зарядлаган. Телефон розетка, компьютер ёки ташқи аккумулятордан зарядлангани тўғрисида маълумот берилмаган. Тўсатдан Samsung Galaxy Note 7 ёниб кетган, силикон ғилоф эриб, экран, корпус ва бошқа қисмларга зарар етган.
Суратдан кўриниб турибдики, телефонни зарядлашда оригинал бўлмаган кабелдан фойдаланилган. Телефоннинг ёнишига қуйидаги ҳолатларни сабаб сифатида келтириш мумкин:
- Жуда юқори кучланиш;
- Ташқи омиллар таъсирида юзага келган параллел қизиш;
- Оригинал бўлмаган аксессуарлар;
- Зарядлаш пайтида телефондан фойдаланиш;
- Қисқа туташувга сув тушиши.
Samsung телефонларнинг фойдаланувчи йўриқномаларида мос бўлмаган зарядлаш қурилмаларидан фойдаланмасликка чақиради. Телефонни қувватлашда фақат Samsung томонидан тасдиқланган аксессуарлардан фойдаланиш керак.
Ушбу ҳолат юзасидан электрон нашрларга фикр билдирган экспертлар, муаммо смартфонда эмаслигига ишонмоқдалар. Ҳамма гап ўтказгичда. Чунки бундай йирик телефонни зарядлаш учун катта қувватли ток кучи зарур бўлади. Бироқ адаптер бундай ток билан смартфонни таъминламаган. Смартфон токка бевосите эмас, балки ўтказгич орқали юборилгани сабабли, аввал ўтказгичдаги арзон материаллардан қилинган қисмлар, сўнг эса смартфоннинг ғилофи ёниб кетган бўлиши мумкин. Бу эса ўз-ўзидан смартфоннинг ёнишига олиб келган.
Эслатиб ўтамиз, бундай ҳолатлар компаниянинг аввалги моделлари билан ҳам содир бўлган. Бироқ уларнинг деярли ҳаммаси фойдаланувчиларнинг эҳтиётсизлиги ёки бепарволиги туфайли юз берган.
