Samsung раҳбари Galaxy Note 9'ни танқид қилди
Samsung компанияси Galaxy Note 9 фаблетини жорий йилнинг июль ойи ўрталарида тақдим қилишни режалаштираётган эди. Бироқ тақдимот 2 ҳафтага кечиктириладиган бўлди. Бунинг сабаби компания уни янада ҳашамдор дизайнда ишлаб чиқармоқчи. Бу тўғрида Корея Республикасининг The Bell нашри ишончли манбага асосланиб хабар тарқатмоқда.
Маълум бўлишича, ушбу ташаббус Samsung йўлбошчиси Ли Жэён (Lee Jae-yong) дан чиққан. Вице-президент бир нечта смартфон дўконларида бўлиб, рақиб компанияларнинг маҳсулотларини ўрганиб чиққан. У рақиб компанияларнинг смартфонларини юпқа корпусга эга бўлганлигини эътироф қилган.
Унинг фикрига кўра, Samsung гаджет ишлаб чиқаришда унинг корпус эргономикасига алоҳида эътибор қаратиши зарур. Мисол учун, смартфон корпуси юпқа бўлса, унинг фойдаланувчи кафтида жойлашуви ҳам қулай бўлади. Унинг таклфини компания топ-менежерлари қўллаб-қувватлашган. Шу сабабли Samsung Galaxy Note 9 флагмани корпуси 0,5 мм ҳажмга қисқарадиган бўлди. Бунга эса фаблетга янги авлод ҳимоя шишасиини ўрнатиш орқали эришилади. Бу шиша юпқа бўлиш баробарида пишиқ ҳамдир.
Samsung Galaxy Note 9 деярли туб ўзгаришларга эга бўлмайди. Янги авлод фаблети электрон перо билан таъминланади. 6,38 дюймли дисплей эвазига унинг гавдаси йирикроқ бўлади. Exynos 9810 ёки Snapdragon 845 процессори, 6 гигабайтли тезкор ҳамда 128/256 Гб доимий хотира, ҳатто 512 гигабайтли гигант доимий хотира билан у диққатни тортади.
