SanDisk 1 терабайтли SD-карта чиқаради
Сўнгги вақтларгача энг йирик сиғимли SD-карта 512 гигабайтни ташкил қилар эди. Эндиликда эса SanDisk томонидан тақдим этилган SD-картада 1 терабайтгача маълумотни сақлаш мумкин. Бир терабайтли SanDisk SDXC хотира картаси Кёльн шаҳрида ўтказилган Photokina кўргазмасида намойиш этилган. Бундай йирик сиғимли хотира картаси 4К ва 8К форматидаги видеолар ёки 360 градусли роликларни ёзадиган фойдаланувчиларга асқотиши мумкин.
“Биз тасвир билан боғлиқ энг сўнгги технологияларни тақдим этишдан бағоятда хурсандмиз”,- дейди Content Solutions, Western Digital вице президенти Динеш Бахал. –“Бундан 16 йил муқаддам биз 64 МБ хотира сиғимига эга илк SanDisk SD карталарини таништирган эдик, бугун эса 1 ТБ сиғимли караталарни ишлаб чиқармоқдамиз”.
“Бундан бир неча йиллар аввал 1ТБли хотира карталари ўта футуристик ғоядай туюларди, бугун бўлса биз ушбу ғоянинг ҳақиқатга айланганини кўрмоқдамиз. Бундай катта хотирали карталар юқори сифатли видеоларни суратга олишда ёрдам бериши табиий”,- деб таъкидлаган Сэм Николсон, Stargate Studios ижрочи директори, АҚШ киноматографлар уюшмаси аъзоси.
Ҳозирча ушбу карта сотувга чиқарилмаган. Картанинг нархи ҳақида ҳам маълумот берилмаган, бироқ бундай йирик сиғимли карта қиммат туришини тахмин қилиш мушкул эмас.
