Sony уни лидерликка қайтарувчи илғор флагманларни тайёрламоқда
Sony’нинг мобиль воситалар бўлинмасида юзага келаётган муаммолар, мобиль савдонинг пастлигига қарамасдан, компания янги смартфон ишлаб чиқаришдан тўхтаётгани йўқ. Хусусан, Берлинда бўлиб ўтадиган IFA 2016 кўргазмасига компаниянинг янги — Xperia F8331 ва F8332 флагманлари билан иштирок этиши маълум бўлди. Бир муддат аввал мазкур смартфоннинг илк суратлари интернет тармоғида намойиш қилинган эди.
Янги флагман Xperia X Performance моделининг такомиллашган талқини бўлиб, дизайн жиҳатдан бир оз фарқ қилади. Хусусан, Xperia F8331 ва F8332 “ақлли телефон”ларининг корпуси силлиқ қайрилган ён томон ҳошияларга, сирпанмайдиган дағал металлдан тайёрланган орқа панелга эга.
Гаджет 5.1 дюймли Full HD-дисплей, илғор Qualcomm Snapdragon 820 процессори билан таъминланган бўлади. Маълумотларга қараганда флагманга 2 та бош камера ўрнатилади. Бош камера 23 мегапикселли, олд камера 13 мегапикселли сурат, 4K-видео тасвирга олади. Xperia F8331 ва F8332 мобиль алоқа воситалари компания илк маротаба USB Type-C туридаги универсал портни татбиқ этган илк смартфон бўлади.
Эслатиб ўтамиз, анъанавий равишда ўтказиб келинадиган IFA кўргазмаси жаҳоннинг нуфузли электроника ва ахборот технологиялари кўргазмаси бўлиб, у жорий йилнинг 2 – 7 сентябрь кунлари Берлинда бўлиб ўтади. Унда Sony’нинг янги флагманларга бағишланган алоҳида матбуот тадбирини ташкил этиши кутилмоқда.
