Урса-синмас, сувда чўкмас–Blackview BV8000 Pro сотувга чиқди
5 июнда Прагада бўлиб ўтган тақдимотда Хитойнинг Blackview компанияси ўзининг янги гаджетларини намойиш қилди. Уларнинг орасида кучли ҳимояланган ва чўкмайдиган Blackview BV8000 Pro смартфони диққатга сазовор. Бу смартфон айни пайтда $172,99 доллардан сотилаётган Blackview BV7000 Pro’нинг “меросхўри”дир.
Шу куниёқ сотувга чиққан Blackview BV8000 Pro ҳозирча жаҳондаги кучли ҳимояланган энг арзон мобил алоқа воситасидир. Blackview BV8000 Pro интернет дўконида $259.99 доллардан сотилмоқда. Шу билан бирга, унинг платформа имкониятлари ҳам чакки эмас. Жумладан, смартфон 8 ядроли Helio P20 чипсети, 6 Гб тезкор ва 64 Гб доимий хотира, 5 дюймли FullHD сиғимли ва усти Gorilla Glass 3 шишаси билан ҳимояланган дисплей билан “қуроллантирилган”.
Ишлаб чиқарувчи камераларнинг илғорлигини ҳам диққатдан қочирмаган: олд камера учун Samsung’нинг 8 мегапикселли, бош камера учун 16 мегапикселли Samsung S5K3P3 модуллари танланган. Смартфон сувда чўкмайди ва 1,5 метрлик баландликдан тушиб кетса ҳам омон қолади. У чанг ва сувдан ҳимояланганликни англатувчи IP68 сертификатига эга. Blackview BV8000 Pro’да бармоқ излари сканери мавжуд.
Blackview BV8000 Pro Android 7.0 Nougat бошқарувида ишлайди. Унинг аккумулятор сиғими 4180 мА соат ва бу батарея тезкор қувват олиш функцияга эга. Гаджет замонавий алоқа тармоқларини, GPS/ГЛОНАСС навигация тизимларини, Wi-Fi ва Bluetooth 4.0 симсиз алоқа стандартини, microSD қўшимча хотира флешкасини қўллаб-қувватлайди.
