Ўзбекистоннинг конвертация карталари энди Туркия, БАА ва Хитойда ишламайди
Ўзбекистон Марказий банки 2016 йил 1 июлдан бошлаб, конвертация карталардан фойдаланишнинг янги қоидаларини жорий қилди, деб хабар қилмоқда Sputniknews-uz.com сайти.
Янги қоидаларга мувофиқ, эндиликда ўзбекистонликлар ўз конвертация карталаридан Туркия, Хитой Халқ Республикаси ва Бирлашган Араб Амирликлари мамлакатларидаги улгуржи ва чакана савдо пунктларидаги терминалларда фойдалана олмайдилар.
Ўзбекистон пластик карталари: виртуал пуллар машмашасига қачон чек қўйилади?
Бундан ташқари, маблағлар ҳамда конвертация карталари орқали амалга ошириладиган транзакциялар хавфсизлигини янада кучайтириш мақсадида, Ўзбекистон ҳудудидан ташқарида нақд пулни ечиб олиш лимити ҳам қайта кўриб чиқилди. 2016 йил 1 июлдан бошлаб чет элда бўлган ўзбекистонликлар ўз карталаридан бир ойда бор-йўғи 300 доллар ечиб олишлари мумкин бўлади. Бунга қадар Ўзбекистон фуқаролари ўзларига тегишли карталардан бир кунда 100 долларга яқин маблағни ечиб олишлари мумкин эди.
“Ушбу чоралар кўрилишига сабаб, сўнги вақтларда конвертация карталаридан санкцияланмаган тарзда фойдаланиш ҳолатлар авж олиб кетди, айниқса, бу ҳолатлар Туркия, Хитой ва БААдаги улгуржи ва чакана савдо пунктларида ҳаддан зиёд кўп кузатилди”, — деб таъкидлаган Марказий Банк вакили.
