Хитойда ZTE`нинг ҳошиясиз смартфони сертификатланди
Жорий йилда ZTE компанияси Хитой чегараларидан ташқарида сотиб олиш мумкин бўлган илк смартфонлардан бирини ишлаб чиқаришга киришишни режалаштирган. Жаҳон бозорига йўл оладиган Nubia бренди остидаги мазкур модел NX529J рақами билан ишлаб чиқарилади. Янги ускунага оид тафсилотлар TENAA сертификатлаш маркази базасида пайдо бўлди, дея хабар қилмоқда MyDrivers.com.
Ускунанинг ташқи кўриниши айни пайтдаги ZTE Nubia Z9 флагманини эслатади. Бироқ бир муҳим фарқ мавжуд: орқа панелда бармоқ изи сканери жойлаштирилган.
Смартфоннинг олд ва орқа панели 2.5D ойнаси билан қопланган. Қобиқ (корпус)нинг металл ҳошияси эса қабариброқ чиққан. 5 дюймли дисплейнинг “у қирғоқдан бу қирғоққача” бўлган пикселлар сиғими 1920×1080 нуқтани ташкил этади. Смартфон “юраги” 1,5 ГГцли саккиз ядрога эаг процессордан ташкил топган. Маълумотларга кўра, процессор Snapdragon 615/616 чипларидан иборат. Шунингдек, 3 Гб тезкор ҳамда microSD карточкани қўллаб-қувватлайдиган 64 Гб доимий хотирага эга. Камераси 16 Мп асосий ва 8 Мп олд модулларни ўз ичига олган. Операцион система — фирма дастурий қопламаси ўрнатилган Android 5.1.1. Қобиқ қалинлиги 8 миллиметр бўлиб, вазни 138 граммдан ошмайди.
Янги смартфон бўлғуси Nubia Z11 флагманининг соддалаштирилган талқини бўлиши мумкинлиги истисно қилинмаяпти.
