Хитойлик йигит бутилка шишасидан ажойиб узук кўзини ясади
Севгилисига турмушга чиқишни таклиф қилмоқчи бўлган хитойлик йигит узук учун бутилка шишасидан ажойиб кўз ясади. Узукнинг кўзига қараб ушбу жозибадор гавҳар оддий бутилка шишасидан ишланганига ишонгинг келмайди. Йигит бу билан қимматбаҳолик ва қадр фақатгина заргарлар томонидан яратилган буюмлардагина эмас, балки меҳр билан ишланган оддий буюмларда ҳам мавжудлигини исботлади. Айниқса, бундай совға буюмлари суйган инсонинг қўли билан ясалган бўлса.
Баъзи хабарларга кўра, йигит Шанхай мода ва муҳандислик университетида таҳсил олади. У узук кўзини оддий яшил бутилка шишасининг қуйи қисмидан ясаган. Расмда кўриниб турганидек, бу ўйлаганимиздек, оддий жараён эмас. Бундай материалдан жозибали узук кўзини ҳосил қилиш учун маҳорат, сабр ва кучли эътибор керак. Шунингдек, йигит ушбу кўзни ясашда геометрия ва оптика қоидаларидан самарали фойдаланган. Натижада тенг шаклларга эга бўлган кўз ёруғликни бир хил миқдорда қайтарадиган бўлган.
Бундай маҳорат ва ғоядан таъсирланган Хитой ижтимоий тармоқлари фойдаланувчилари ясалган узук кўзи акс этган тасвирни 10 000 мартадан кўпроқ улашишган.
