iPhone 8 учун кучли процессор ишлаб чиқариш бошланди
TSMC — тайваннинг ярим ўтказгичлар ва чиплар ишлаб чиқарувчи компанияси iPhone 8 учун Apple A11 процессорини ишлаб чиқаришни йўлга қўйди. Бу тўғрида DigiTimes нашри ишончли манбааларига асосланиб хабар тарқатмоқда. Техник етишмовчилик боис чипларни ишлаб чиқариш бир оз кечиккан. Маълумотларга кўра, TSMC 2017 йилда Apple флагман смартфонлари учун процессор етказиб берадиган ягона ишлаб чиқарувчи.
Apple A11’нинг маълумотларни 10 нанометрли технологик жараёнда қайта ишлайдиган чиплиги айтилмоқда. Эслатиб ўтамиз, айни пайтда андроид смартфонлар учун ишлаб чиқарилаётган Snapdragon 835 процессори ҳам худди шу тех-жараёнда ишлайди.
Apple A11, шунингдек iPhone 7s ва iPhone 7s Plus смартфон моделларида ҳам ўрнатилади. Бу чип ҳам Apple компаниясининг ўзи томонидан шахсий тажриба ва ечимларига таяниб тайёрланади ва оммавий ишлаб чиқариш учун пудратчига берилади. Чиплар самарадорлигини баҳолайдиган AnTuTu бенчмарки маълумотларига кўра, айни пайтдаги iPhone 7 ва iPhone 7 Plus моделларидаги процессорлар мобил саноатнинг энг кучли чиплари ҳисобланишади.
Норасмий маълумотларга қараганда, iPhone 8 смартфони 5,8 дюймли OLED-дисплейга эга бўлади. Аппаратда 3 гигабайтли тезкор хотира ва илғор 2 та сенсорли бош камера бўлади. Янги авлод iPhone’ларининг тақдимоти сентябрда кутилмоқда.
