27 мартдаёқ тақдим этиладиган iPhone SE 2’ни сифатли суратларда кўрамиз!

  •   DiMaX
  •  3522
  •  19.03.2018 09:33

27 мартдаёқ тақдим этиладиган iPhone SE 2’ни сифатли суратларда кўрамиз!

Apple корпорацияси яқинда, кутилмаганда ўзининг навбатдаги тақдимот тадбирига таклифнома тарқатганди. Унда намойиш этилиши кутилаётган гаджетлар орасида iPhone SE 2 смартфони ҳам бор.

ЎҚИНГ: Apple янги iPhone'нинг тақдимот кунини эълон қилди

Машҳур дизайнер Мартин Хайек эса ушбу айфоннинг ташқи кўриниши қандай бўлишини кўрсатиш учун, iPhone SE 2 рендер-суратларини ишлаб чиқди. Янги айфон дизайнини яратишда у ўтган йилги iPhone 8 ҳамда биринчи авлод iPhone SE смартфонларининг қиёфасини асос қилиб олди. Бу иккаласининг бирлашувидан чиндан ҳам чиройли телефон юзага келгани суратларда намоён бўлиб турибди.

Расмларда акс эттирилишича, iPhone SE 2 (2018) ўзининг биринчи авлодига жуда ўхшаш. У диагонали 4 дюймлик экранга эга, дисплейнинг остида эса «Home» тугмачаси жойлашган. Бу тугмачага Touch ID бармоқ изи сканери интеграция қилинган. Яъни, янги айфон олд томонидан кўриниши бўйича 2016 йилдан бери сотувда бўлган iPhone SE моделидан фарқ қилмайди.

Бироқ унинг орқа панелида сезиларли ўзгаришлар амалга оширилган. Иккинчи авлод ихчам айфоннинг орқа қопқоғи буткул шишадан ишланган. Бунинг сабаби маълум, албатта – Apple мазкур қурилмасига 7,5 Вт қувватга эга бўлган Qi симсиз қувватлаш технологиясини жорий этмоқда.

Айрим манбаларга кўра эса, iPhone SE 2 смартфонига Power Delivery тезкор қувватлаш технологияси ҳам татбиқ этилади. Унинг эвазига бу айфон 1 соатлик муддатда тўлиқ қувватланиб бўлади.

ЎҚИНГ: iPhone X ва бошқа Apple смартфонларининг нархлари (2018 йил 14 март)

iPhone SE 2 орқа панелининг юқори чап бурчагида якка модулли асосий камерага кўзимиз тушади. У асосий корпус сатҳидан бироз бўртиб чиққан, худди 2017 йилда тақдим этилган iPhone 8 моделидаги сингари.

Apple иккинчи авлод ихчам айфонининг каркасини металлдан ясаган. Унга камида iPhone 7 Plus моделидаги каби 4 ядроли A10 Fusion процессори ўрнатилиши тахмин қилинмоқда.

Айтиш керакки, юқоридаги суратлар – дизайнернинг тахминлар асосида яратган ижод маҳсули, ҳақиқий айфон бундан бошқача бўлиши ҳам мумкин. Яқинда интернетда тарқатилган видеодаги смартфон ҳам iPhone SE 2, дея тахмин қилинган, аммо у буткул бошқача кўринишга эга.

ЎҚИНГ: iPhone SE 2 «жонли» видеода кўрсатилди: фейкми ёки ҳақиқий?

Terabayt.uz сайтининг видеолари: Youtube'даги каналимизда!