Металл корпусли, лекин арзон Xiaomi Redmi S2: техник хусусиятлари, расмий суратлари ва нархи

Хитойлик ёш IT-корпорация ўзининг янги – Redmi S2 ҳамёнбоп смартфонини 10 май куни тақдим этишидан хабарингиз бор. Унинг бир қатор «жонли» суратлари ва ҳатто видеосини ҳам эълон қилганмиз.

ЎҚИНГ: iPhone X дизайнидаги ҳамёнбоп Redmi S2: «жонли» видео ва суратлари, нархи ва хусусиятлари, тақдимот санаси...

Тақдимот санасидан илгарироқ интернетга ушбу қурилманинг расмий тасвирларини ҳам чиқаришди. Бундан ташқари, инсайдерлар унинг барча техник хусусиятларини, ҳатто нархини ҳам ошкор этишди.

Ушбу маълумотларга қараганда, Redmi S2 смартфони 5,99 дюймлик IPS-экран билан таъминланган. HD+ форматли, яъни 1440х720 пикселли бу дисплей томонлари ўзаро 18:9 нисбатда.

Xiaomi мазкур қурилмасини 1,8 ГГц такт частотасида ишловчи саккиз ядроли Qualcomm Snapdragon 625 процессори билан жиҳозлаган. Унинг тезкор ва доимий хотираси тегишлича 3 ва 32 гигабайтлик бўлади (бошқа модификацияларда ҳам чиқарилади). Унинг қўшалоқ асосий камераси 12 + 5, олд камераси эса 16 МПлик сенсорларга эга.

Ушбу смартфонда кўпчиликка маъқул келадиган битта жиҳат – биратўла иккита SIM-картадан ташқари яна microSD форматли хотира картасини ҳам ўрнатиш мумкин бўлган тўлақонли слот мавжудлигидир. Унинг ёрдамида телефон хотирасини яна 256 гигабайтгача кенгайтириш имкони мавжуд.

ЎҚИНГ: Xiaomi Redmi S2: янада кўпроғини кутинг

Шунингдек, бу гаджет фойдаланувчининг юзини таниш орқали қулфдан чиқарувчи юз сканери технологияси – Face Unlock билан ҳам таъминланган.

Арзон модел бўлишига қарамасдан, Redmi S2 металл корпус ҳамда 3080 мА/соат ток сиғимига эга батарея билан жиҳозланган. Корпус ўлчамлари 160.73х77.26х8.1 миллиметрга тенг. Унинг орқа панелида доирасимон шаклдаги дактилоскопик датчик ҳамда қўшалоқ фотокамерага кўзимиз тушади.

Xiaomi ўзининг Redmi S2 девайсини пушти, кул ранг ва тилларанг тусли корпусларда ишлаб чиқаради. Унга бошиданоқ Android 8.1 Oreo операцион тизим талқини ўрнатилган бўлади. Мазкур смартфон бир нечта хил хотира ҳажмига эга модификацияларда тақдим этилади ва 159 дан 187 АҚШ долларигача миқдорида нарх белгиланади.

Ушбу моделнинг савдога қачон чиқарилиши ҳозирча номаълум, аммо «хитойлик Apple»нинг бошқа кўплаб смартфонлари Ўзбекистонда ҳам расман сотилмоқда.

ЎҚИНГ: Ўзбекистон бўйлаб БЕПУЛ етказиб берилувчи Xiaomi смартфонлари ва бошқа гаджетлари нархлари (2018 йил 28 апрель)