Mi 7 Plus – сканерли ва “ўйиқ”ли экранга эга илк Xiaomi смартфони!
Xiaomi компанияси 27 мартда бўлиб ўтган матбуот анжуманида Mi MIX 2S флагманини намойиш этди ва у кўп жиҳатлари билан дунёдаги етакчи смартфонлар қаторидан муносиб жой олди. Шу билан бирга, кўпчилик кутган айрим инновацион хусусиятлар унга жорий этилмаганлиги ҳам маълум бўлди.
ЎҚИНГ: Xiaomi Mi Mix 2S флагмани тақдим қилинди
Энди эса «хитойча Apple» ўзининг Xiaomi Mi 7 моделини тақдимотга тайёрламоқда. Бундан ташқари, компаниянинг яна бир – Mi 7 Plus русумли флагман устида ҳам ишлаётгани ошкор бўлди. XDA форумидаги дастурчилар 28 март куни MIUI 9 прошивкасининг сўнгги альфа-версиясини ўрганиб чиқаётиб, ушбу моделга тегишли айрим хусусиятларни аниқлашди.
Охирги прошивкани синчиклаб ўрганиб чиққан дастурчилар унда dipper ҳамда dipperold кодли номларга эга смартфонлар ҳақидаги эслатмаларга дуч келишган. Булардан биринчиси остида Xiaomi Mi 7 смартфони яширилган, иккинчисида эса унинг янада илғор ва қимматбаҳо версияси – Xiaomi Mi 7 Plus кўзда тутилган, дейишмоқда кузатувчилар.
Хабар қилинишича, Xiaomi Mi 7 Plus экранида купертиноликларнинг iPhone X суперфлагманидаги каби «кемтик»ли экран қўлланади. Бугина эмас – ушбу дисплейнинг ўзига бармоқ изи сканери ҳам жорий этилади!
ЎҚИНГ: Виртуал сканерга эга илк смартфон расман тақдим қилинди
Операцион тизимни кўздан кечираётиб, дастурчилар унда ҳатто тўлиқ ўлчамли скриншотни ҳам учратишган. У Mi 7 Plus моделида бармоқ изи сканери бевосита дисплейнинг ўзига интеграция қилинганлигини исботлаб турибди.
Қолган жиҳатларига келадиган бўлсак, Xiaomi’нинг бу иккала флагмани ҳам экраннинг тепа қисмида «ўйиқ»қа эга, аммо бу «кемтик» жуда ихчам. Экраннинг барча бурчаклари ҳам худди iPhone X’дагидек думалоқланган. Қурилмалар илғор Qualcomm Snapdragon 845 базасида ишлайди.
ЎҚИНГ: Xiaomi Mi7'даги бир жиҳат унинг савдосига салбий таъсир қилади
MIUI 9 прошивкасида кўрсатилишича, «хитойча iPhone X» дисплейларига ўрнатилувчи дактилоскопик сенсорларни биратўла икки компания – Synaptics ҳамда Goodix етказиб беради. Булардан биринчиси айни дамгача бундай датчикларни учта – Vivo X20 Plus UD, X21 UD ва Apex смартфонлари учун етказиб бермоқда.
Буларнинг бари шундан далолат бермоқдаки, Xiaomi Mi 7 Plus экранида IPS эмас, балки албатта OLED-технологиялар қўлланади. Зеро, Synaptics ва Goodix компанияларининг датчиклари фақат органик экранлар биланагина ишлай олади.
Mi 7 Plus модели яна Adreno 630 график тезлатгичи ва Snapdragon X20 LTE модеми, 4000 мА/соат сиғимли аккумулятори ва тезкор қувватлаш технологияси, шунингдек, 2 карра оптик зумга эга қўшалоқ камераси билан ҳам мақтана олади.
Xiaomi Mi 7 ҳамда Mi 7 Plus смартфонлари шу йилнинг апрелидан июнигача бўлган муддат оралиғида расман тақдим этилиши кутилмоқда. Бу борадаги янги маълумотлардан ҳамда нархларидан биринчилар қаторида бохабар бўлиб бориш учун биздан узоқлашманг.
ЎҚИНГ: Тошкентда Xiaomi смартфонлари ва бошқа гаджетлари нархлари (2018 йил 26 март)
