Telegram’да нотаниш контактлар пайдо бўляптими? Бартараф этамиз!

  •   DiMaX
  •  19083
  •  20.02.2018 13:42

Telegram’да нотаниш контактлар пайдо бўляптими? Бартараф этамиз!

Айрим ҳолларда Telegram фойдаланувчилари шундай муаммога дуч келишади: контактлар сафидан аллақачон ўчириб юборилган, баъзан эса ҳатто умуман нотаниш контактлар пайдо бўлиб қолади. Қуйида шу муаммонинг юзага келиш сабабларини ва ундан қутулиш йўлларини кўриб чиқамиз.

ЎҚИНГ: Android’дан Android’га контактларни ўтказиш

Нега шундай бўлади?

Мессенжер орқали «Фалончи ҳам Telegram’га қўшилди» қабилидаги хабарлар сизга ҳам келгандир, ҳойнаҳой. Баъзан умуман нотаниш контактлар смартфоннинг «Телефон китобчаси», яъни қурилманинг ўзидаги контактлар рўйхати билан синхронлашади; бу ҳолат  iOS-гаджетларда ҳам, Android-девайсларда ҳам учрайди.

Бунинг сабаби шундаки, Telegram тизими ҳар бир аккаунт учун ўз серверида телефон рақамларининг махфий рўйхатини сақлаб қўяди. Улар SIM-картадан, «Телефон китобчаси»дан, бошқа мессенжерлардан, Google ва Apple ID аккаунтларидан кўчириб олинади.

Нимага керак бу?

Telegram’га янги фойдаланувчи қўшилганида, мессенжер бу ҳақда у билан «боғланган» барча аккаунт эгаларини хабардор қилишни кўзда тутади. Бир қарашда ғалати туюлса-да, мазкур мессенжерни энди ишлата бошлаганлар ўзларининг таниш-билишларини Telegram’да ҳам тезда топиб олишлари учун бу керак.

Хулласи калом, Telegram’да «бегона» контактлар қуйидаги ҳолларда пайдо бўлади, яъни, иккита аккаунтнинг контактлари бир-бирига ўтиб қолади:

  • Telegram ўрнатилган смартфон ёки планшетга бошқа SIM-карта қўйилса;
  • Мазкур мессенжер ўрнатилган қурилмада бошқа бировнинг Telegram’даги, Google ёки Apple ID’даги аккаунти орқали кирилса;
  • Сиз бошқа бир девайсда ўз Telegram-аккаунтингизга кирсангиз.

ЎҚИНГ: Хушхабар: энди Telegram’га бир нечта аккаунт қўшиш мумкин!

Қандай қутулса бўлади?

Telegram серверидаги махфий рўйхатни тозалашнинг кескин усули – ўз Telegram-аккаунтингизни ўчириб юборишдир. Шунда ҳаммасидан биратўла қутуласиз.

Лекин бундай қилишни тавсия этмаймиз, зеро, ортиқча контактлардан қутулишнинг осонроқ йўллари ҳам бор. Бунинг учун, смартфонингизнинг операцион тизимига боғлиқ ҳолда, қуйидаги усуллардан бирини қўллашингиз мумкин.

iOS тизимли девайслар учун контактларни сервердан ўчиришнинг содда усули: Telegram’нинг бош саҳифасини очасиз. «Шестерняча» шаклидаги созламалар белгичаси устига тез-тез 10 мартадан кўпроқ босасиз. Очилган менюда «Сервердаги контактларни тозалаш» («Reset Server Contacts») опциясини танлайсиз.

Android тизимли гаджетлар учун Telegram-контактларни сервердан ўчиришнинг осон йўли: клиентни очиб, бош менюни босасиз. «Шестерняча» шаклидаги белгичаси орқали созламаларга ўтасиз ва энг охиригача тушасиз. Шу ерда Telegram’нинг версияси ҳақидаги хира рангли ёзув бор, ўшанинг устига озроқ вақт – вибрацияли сигнал бўлгунича босиб турасиз. Кейин уни қўйиб юборасиз ва иккинчи марта ҳам худди шунча вақт босиб турсангиз, «Тузатиш менюси» («Меню отладки») сарлавҳали ойнача чиқади.

Ундаги «Контактларни қайта юклаш» («Перезагрузить контакты») бандини, кейин эса – «Импорт қилинган контактларни бекор қилиш» («Сбросить импортированные контакты») бандини танлайсиз.

Айримларини танлаб ўчириш ҳам мумкин

Агарда Telegram’га қўшилиб қолган контактларнинг ҳаммасини бирваракайига эмас, балки улар орасидан айримларини танлаб ўчириш керак бўлса, бунинг учун https://web.telegram.org/ манзили орқали мессенжернинг веб-версиясини очишингиз керак бўлади.

Унинг юқори чап бурчагида жойлашган, учта горизонтал чизиқча шаклидаги меню тугмачасини босасиз. «Контактлар» («Contacts») бандини танласангиз, ойнача шаклида контактлар рўйхати чиқади. Шу ойначанинг юқори ўнг томонидаги «Таҳрирлаш» («Edit») тугмачасини босасиз, сўнг битта-битта танлаб, пастки ўнг бурчакдаги «Ўчириш» («Delete») тугмачасини босасиз – вассалом!

Хўш, контактлар рўйхатини тозалашга киришамизми?

ЎҚИНГ: Telegram X’нинг оддий Telegram’дан фарқи нималарда?