Янги iPad планшети 4 апрелда тақдим этилиши мумкин

Ўз анъанасига кўра, Apple йил давомида бир нечта тадбир уюштиради ва улардан бири баҳорнинг бошида бўлиб ўтади. Янги iPad планшетларининг яқин орада тақдим этилиши ҳақида интернет тармоғида кўпдан бери гап-сўзлар тарқалган, аммо ҳали-ҳануз бунинг бирорта тасдиғи чиққани йўқ.

Ниҳоят, Apple World Today нашри битта тахминни эълон қилди – компаниянинг навбатдаги матбуот анжумани 4 апрелда бўлиб ўтиши мумкин. Мазкур хулоса 12,9 дюйм диагоналли экранга эга iPad Pro савдога чиқарилиши ҳақидаги хабарларга асосланган.

iPad планшетларининг навбатдаги партияси келтирилиши вақти сифатида Apple’нинг бир неча дўконларида бараварига 4 апрель санаси белгиланган. Тағин, улардаги маълумотларга кўра, ўша куни мавжуд барча рангларда, хотира ҳажмларида ва симсиз алоқа интерфейсларини қўллаб-қувватловчи планшетлар савдога чиқарилади.

Булардан ташқари, журналистлар билан ўтган йилги охирги учрашувида Тим Кук, кейинги учрашув компаниянинг янги штаб-квартирасида уюштирилишини эълон қилган эди. Apple Park деб номланган бу янги бинонинг расман иш бошлаши эса апрелнинг бошига мўлжалланган.

Одатга кўра, Apple учрашув ҳақида журналистларга тадбирдан бир ҳафта олдин хабар қилади. Шундай экан, компаниянинг расмий таклифлари тарқатилишини кутишга тўғри келади.