Motorola'нинг афсонавий Rizr бренди консепт смартфон кўринишида қайтмоқда!

Барселонада бўлиб ўтаётган Бутунжаҳон мобил конгрессида ҳар йилгидек техно гигантлар ўзларининг компаниядан ташқарига чиқарилмаган сирли технологияларини бирма-бир кўрсатишмоқда. Ана шундай қурилмаларнинг бири Motorola'нинг Rizr смартфони бўлиб, уни 2006 йилги Rizrънинг эҳтимол бугунги кундаги кўриниши дейишимиз ҳам мумкин.

Motorola Rizr консепти 5 дюймдан 6.5 дюймга чўзиладиган экран эга смартфон бўлиб, бунинг учун телефонни ёқиш тугмасини икки марта босишингиз кифоя (лекин Motorola агар бу қурилма келажакда кенг ишлаб чиқариладиган бўлса, ушбу ҳаракат тугмаси ўзгариши мумкинлигини маълум қилган).

5 дюймли ҳолатда дисплейнинг унинг ортиқча қисми телефон орқасига ўралган ҳолатда туради. Бу эса ундан иккинчи дисплей сифатида фойдаланиш имконини беради, худди ҳозирги Galaxy Z Flip 4 ва Oppo Find N2 Flip букламафонларида бўлгани каби.

Масалан, дисплейнинг орқа томонга ўралган қисмида сиз билдиришномларни кўришингиз ёки орқа камера билан селфи тушаётганда камера кўрган нарсани кўриб туришингиз мумкин бўлади. Селфи деганда шуни айтиш керакки, агар эътибор берган бўлсангиз қурилма дисплейида олд камера тирқишини кўрмайсиз, чунки у экранга ўрнатилмаган.

Селфи камера билан бирга, қурилма динамикаси экран панели остида жойлашган. Агар сиз олд камера билан селфи қилмоқчи бўлсангиз ёки қўнғироқ қилсангиз, қўнғироқ қабул қилсангиз экран пастга тушиб туради.

Rizr экран механизми YouTube каби иловаларда видеони янада каттароқ майдонда кўриш, ҳамда, электрон почта иловаларида матн ёзишда кўпроқ жой бериш учун автоматик равишда чўзилади. Шунингдек, иконкалар ва орқа фон сурати дисплей кенгайганда ёки кичрайганда қайта жойлашади.

Қурилма BOE томонидан ишлаб чиқарилган pOLED дисплей билан жиҳозланган. Унинг оғирлиги 210 граммни ташкил қилади ва у 3000 мА/соат батареяга эга. Афсуски, қолган техник хусусиятлар ҳозирча очиқланмаган.

Консепт эканлигини ҳисобга олган ҳолда шуни айтишимиз мумкинки, сиз яқин кунларда чўзилувчан экранли Motorola Rizr'нинг сотув пештахталарида кўрмайсиз, чунки компания ҳали унинг устида кўп ишлаши керак. Умуман, бундай турдаги смартфонлар чидамлилиги бир қанча саволларни келтириб чиқаради. Масалан, агар уни тушириб юборсангиз ва у ерга таг қисми билан тушса нима бўлади? Камида экранни тўлиқ алиштиришга тўғри келиши мумкин.

Айтиш керакки, чўзиладиган экранли смартфонлар бугунги кунда унчалик янгилик эмас. Гарчи улар сотувда мавжуд бўлмаса ҳам, биз бир неча йиллар аввал TCL ўзининг слайдер экранли смартфони устида ишлаётгани ҳақида эшитган эдик. LG эса чўзилувчан экранли смартфонни ишлаб чиқарган, бироқ кейинчалик компания уни сотувга чиқаришдан воз кечган эди. Жанубий Кореянинг Samsung компанияси портфолиосида ҳам бундай турдаги смартфонларни кўрганмиз, лекин ҳозирча компания ўз сирларини бой бермаган ҳолда улар устида ишламоқда.

ЎҚИНГ: MWC 2023 кўргазмасида Nothing Phone 1 клони – Unihertz Luna қўлга тушди!