Samsung икки кунда 22 млрд долларга арзонлашди
Bloomberg нашрининг хабар беришича, Galaxy Note7 билан боғлиқ муаммолар туфайли Samsung Electronics компаниясининг биржа қиймати икки кун давомида 22 млрд АҚШ долларга арзонлашиб кетган. Компанияга қарашли акцияларнинг нархи икки кун ичида 10,61%га тушган. Душанба кунидаги савдо натижаларига кўра бренднинг қиймати биржа бозорида 249,52 трлн вон ёки тахминан 226,375 млрд АҚШ долларига баҳоланган.
Воқеаларнинг бундай шиддат билан тус олишига компанияга тегишли флагман модель – Galaxy Note7 билан боғлиқ носозлик ва унинг атрофидаги шов-шувлар сабаб бўлган. Ушбу моделнинг батареясида мавжуд носозлик туфайли жаҳон бўйича бир нечта Galaxy Note7 смартфонлари ёниб кетган. Авиакомпаниялар (жумладан АҚШ Федерал авиация бошқармаси) самолёт бортига мазкур маркадигаи смартфонни олиб киришни ёки ундан фойдаланишни чеклаб қўйган.
Шунингдек, АҚШда смартфоннинг машина салони ичида портлаб кетиши натижасида автомобиль тўлиқ ёниб кетган. Шунингдек, Нью-Йорк шаҳрида 6 ёшли боланинг смартфон ёнишидан жиддий жароҳат олгани ҳақида хабар берилган. Истеъмол товарларининг хавфсизлигини таъминлаш бўйича АҚШ комиссияси фойдаланувчилардан Samsung Galaxy Note7 телефонидан фойдаланишни тўхтатишни сўраган. Гарчи Жанубий Кореялик гигант смартфонларни чақириб олиш бўйича глобал дастурни йўлга қўйган бўлса-да, ҳозирча у кутилган натижани бермаяпти. Компания ҳатто қайтарилмаган хавфли Galaxy Note смартфонларини масофадан фаолсизлантириши ҳақида огоҳлантирган.
Аналитикларнинг фикрича, агар компания тез орада ушбу муаммони бартараф этмаса, йўқотишлар бундан-да улкан бўлиши ҳеч гап эмас.
