Google Glass 2: келажак кўзойнакларини такомиллаштириш давом этади
“Ақлли кўзойнак” дисплейини таъбга кўра мустақил ўрнатиш имконини берувчи Google Glass 2’нинг қандай кўринишга эга бўлишига ойдинлик киритилди. Google Monocle қурилмаси бир кўзга мўлжалланган дисплейга ҳамда бошнинг орқа қисмини ўраб олувчи тутқичга эга.
2015 йилнинг январь ойида Google кўзойнакларнинг биринчи авлодини ривожлантириш дастури – Glass Explorer program ўз ниҳоясига етганини, компания йил охирида янги лойиҳа маҳсулотлари тўғрисида эълон қилган эди.
Маълумотларга кўра, компания Google Glass технологиясининг иккинчи талқинини Project Aura номи билан такомиллаштирмоқда.
Компаниянинг бу галги ҳамкори жаҳоннинг йирик ахборот технологиялари ишлаб чиқарувчиси ҳисобланган Nest Labs компанияси бош директори Тони Фаделл. Бу инсон ахборот технологиялари соҳасининг етакчи инноваторларидан бири сифатида эътироф этилади.
Кўзойнакларнинг такомиллашган версияси икки хил дизайнга эга бўлади. Бири юқорида қайд этилган Glass 2 ҳамда касбий фаолиятда фойдаланишга мўлжалланган Enterprise Edition кўзойнаклари.
Google йирик ишлаб чиқарувчилар ва компаниялар билан ҳамкорликда “Glass at Work” лойиҳаси доирасида турли соҳалар учун ақлли кўзойнаклар ишлаб чиқаришни ҳам қўллаб-қувватламоқда. Бу қурилмаларнинг иш жараёнида хавфсизликни таъминлашда, ишлаб чиқаришда ва ҳатто жарроҳлик амалиётларида кенг қўлланилиши кутилмоқда.
Enterprise Edition кўзойнакларининг 2016 йилнинг баҳор ойларида намойиш қилиниши кутилмоқда. Бугун 1.5 минг АҚШ долларидан сотилаётган ақлли кўзойнакларнинг биринчи авлоди кам ишлаб чиқарилгани боис ҳам баҳоси юқори. Мутахассислар Google Glass истиқболда катта миқдорда ишлаб чиқарилишини инобатга олиб, унинг анча арзон бўлишини таъкидлашмоқда.
Келажак кўзойнакларини яратишда унинг ички, технологик имкониятларига катта эътибор қаратилиб, уларда Texas Instruments CPU русумидаги процессорлар ўрнига Intel процессорларидан, Intel Atom чипларидан фойдаланилади. Истиқболда унинг 4-6 соатга етадиган қувват заҳирасининг имкониятлари янада кенгаяди.
Google Glass 5 мегапикселли фотокамера, 720 пикселда ёзувчи видеокамера билан таъминланган бўлса, эндиги қурилмаларга 8 мегапикселли фотокамералар, видеотасвирни 1080 пиксел форматда ёзиб оладиган видеокамера ўрнатилади.
Фойдаланувчилар ва жамоатчиликнинг фикр-мулоҳазалари, компаниянинг ёндашувидан ҳам кўриниб турибдики, ҳозиргача келажак кўзойнакларининг ёрқин истиқболи ҳақида бир нима дейиш мушкул.
“Мен iPod ва iPhone қурилмаларини яратилиш жараёнида иштирок этган инсон сифатида янги технологиянинг моҳиятини, унинг истиқболини ҳис қиламан. Glass кун келиб шулардек ҳаётимизнинг ажралмас бўлагига айланишига ишонаман. Бунинг учун эса вақт керак бўлади,” дейди Тони Фаделл.
