Samsung ақлли кийим-бошлар ишлаб чиқарди
Samsung компанияси CES 2016 истеъмолчи кўргазмасида, нафақат, сенсор экранли музлатгич ва бошқа турдаги маиший техника анжомларини, балки, ақлли кийимни ҳам кўрсатди.
Ғаройиб либос The Human Fit бренди остида ишлаб чиқарилмоқда. Олдинроқ, бу кийимнинг фақат нишонаси кўрсатилган бўлса, бу гал кўргазмага келтирилган антиқа сарпо дарҳол савдога ҳам қўйилди.
The Human Fit уч туркумдаги кийимларни ўз ичига олади. Бу NFC-датчикли эркаклар костюмлари ҳамда гольф ва фитнес учун махсус либослардир.
Айтишларига қараганда, костюм енгидаги NFC-датчиклар ёрдамида мижозлар ва ҳамкорлар билан тез муносабат ўрнатиш мумкин. Савол туғилади: костюмдан кўзланган мақсад ташрифқоғозлик функцияси бўлса, унинг ўзини сотиб олишнинг нима ҳожати бор?
Спорт кийими эса йиғилганларда катта қизиқиш уйғотди. Спорт иштони ва футболкада сенсорлар ва GPS-қурилма жойланган бўлиб, кишининг жисмний фаоллигини назорат қилишга мўлжалланган. Гольф кийимидаги махсус датчик чавгон зарбалари тўғрисида маълумот тўплайди.
Яна бир янгилик Welt ақлли белбоғидир. Унга ҳам датчик ўрнатилган бўлиб, эгасининг бел айланасини ўлчайди, организм иш фаолияти кўрсаткичларини кузатади, жисмоний фаоллик ва парҳезга доир маслаҳатлар беради.
Қуёш батареяли сумкача аёллар учун ишлаб чиқарилган. Кичкина ва нафис ишланган сумкачага Samsungнинг энг катта планшети сиғади. Унда олтибурчакли қуёш батареялари тизиб жойланган. Ишлаб чиқарувчининг айтишича, қуёшли кунларда сумкача энергия ғамлайди ва ундан қурилмаларни қувватлантирса бўлади. Ҳозирча, унинг сиғими маълум эмас.
