10 ядроли процессорга эга илк смартфон – Zopo Speed8 савдога чиқарилди
Zopo Speed 8 смартфонини MWC 2016 жаҳон мобиль конгрессининг мўъжизаларидан бири, десак бўлади. Боиси 24 февраль куни тақдим этилган ушбу мобиль алоқа воситаси 10 ядроли процессорга эга илк смартфондир. Март ойидан бошлаб ушбу гаджетга олдиндан буюртма бериш мумкин бўлган эди.
Аммо Zopo флагмани шу кунгача ахборот технологиялари қурилмаларини ички имкониятларини баҳоловчи дастурларнинг синовидан ўтмаган эди. Яқиндагина интернет нашрларида Zopo Speed 8’нинг AnTuTu бенчмаркидан ўтказилгани ҳақида норасмий хабарлар тарқалди.
Синов натижаларига кўра, Helio X20 русумидаги процессор ўз номини оқлаб, бошқа рақибларидан анча устун эканини исбот қила олган. Zopo Speed 8 91 464 балл тўплаб, ўзининг кучли смартфон эканини кўрсата олган. Мазкур балл билан у баҳолаш дастурининг расмий рейтингида 4-ўринни эгаллаган.
Samsung ва Qualcomm маҳсулотлари мисолидаги рақобатчилар юқори ва ўрта даражадаги флагманларнинг жиҳатларини ўзаро омухталаштирганликлари учун Zopo Speed 8’дан баъзи устун жиҳатлари бўлиши мумкин.
Helio X20 процессори нафақат тезкор фаолият, балки қурилма қувватини тежашда ҳам инновацион қурилмадир.
Zopo Speed 8 “ақлли телефони” 5,5 дюймли, 1920 х 1080 пиксель сиғимли IPS туридаги FullHD-дисплей, 10 ядроли MediaTek Helio X20 процессори, 4 ГБ тезкор хотира ва 32 ГБ доимий ички хотира, 21 мегапикселли Sony IMX230 сенсорли бош ҳамда 8 Мп олд камерага эга.
Қурилмада 2 та SIM-карта учун бўлмача мавжуд. Унинг аккумулятор батареясининг сиғими 3,500 мА соат. Смартфон Android 6.0 Marshmallow операцион тизимида ишлайди.
Шунингдек, мобиль алоқа воситасида NFC масофали алоқа қилиш технологияси, бармоқ излари сканери, тезкор қувватлаш технолгияси жорий қилинган универсал USB Type-C коннектори мавжуд.
22 март куни компания Zopo Speed 8 смартфонининг баҳоси $299,99 АҚШ доллари экани, унга 28 мартдан 28 апрелга қадар аввалдан буюртма берган харидорларга 20 долларлик чегирма жорий қилинишини маълум қилган эди. Смартфон кеча – 28 апрелдан савдо пештахталарини “забт этди”.
Хитойнинг Zopo Mobile компаниясига 2012 йилда асос солинган. Компаниянинг 2015 йилдан бошлаб ишлаб чиқараётган юқори сифатли смартфонлари айни кунда Европа, Осиё, Африка, Америка бозорларида оммалашиб бормоқда.
