2016 йилнинг энг кўп сотилган смартфони маълум бўлди
Apple’нинг 1,5 йил аввал тақдим қилган iPhone 6s смартфони жаҳон миқёсида 2016 йилда энг кўп сотилган мобиль телефони, дея эътироф этилди. Шундай қилиб, эски айфон “2016 йилнинг энг яхши смартфони” номига муносиб топилган Samsung’нинг сўнгги Galaxy S7 моделини мағлуб қилди. Бу тўғрида IHS Markit халқаро тадқиқот маркази маълум қилмоқда.
Америкалик технология гиганти ўтган йил мобайнида жаҳон бўйлаб 60 миллион дона iPhone 6s мобиль алоқа воситасини сотишга эришган. Шунингдек, “Олма” корпорацияси 2016 йилда халқаро смартфон бозорига 50 миллион дона iPhone 7 сотишга ҳам муваффақ бўлган. iPhone 7 Plus эса бир йил орасида 25 миллион маротаба харид қилинган.
iPhone 6s
Samsung’нинг флагман смартфон модели бўлмиш Galaxy S7 Edge смартфон бозорида 5-ўринда турибди. Ундан жами 25 миллион дона сотилган.
S7 Edge
iPhone 6s девайси 2015 йилнинг 4-чорагида бозорга чиқарилган эди. Samsung’нинг S7 ҳамда S7 Edge 2016 йилнинг февралида намойиш қилинган. Тадқиқот натижаларига кўра, Samsung’нинг S7 флагмани 9-ўринни эгаллаган. Шундай бўлса ҳам, Samsung S7 моделини 2016 йилнинг шу даври оралиғида S6 ва S6 Edge’дан кўра 10 миллион дона кўпроқ сотишга эришган. Компания ёниб кетаётган Note 7 смартфонини қайтариб олиш тўғрисида эълон берганидан кейин S7 моделининг савдоси кўтарилиб кетган.
Бироқ, Samsung 2016 йилда энг кўп сотилган смартфон брендларининг “топ-5″лигига кирган. Боиси, унинг ўрта нархли “ақлли телефон”ларига ҳам бозорда эҳтиёж юқори.
Huawei жаҳонда энг кўп смартфон сотаётган компаниялар учлигидан ўрин олди. Аммо, эҳтиёж энг катта 10 та смартфон брендлари орасида унинг бирорта смартфон модели мавжуд эмас.
