$4 долларлик смартфон сотаётган компания раҳбари ҳибсга олинди

Ҳиндистонликларга $4 долларлик смартфон ваъда қилган Ringing Bells компанияси асосчиси 23 февраль куни товламачилик айби билан ҳибсга олинган. Компания дилерлари буюртма қилинган смартфонлар етказиб берилмагач, полицияга шикоят қилган.

Ringing Bells асосчиси Моҳит Гол 2016 йилда “Freedom” номли 251 рупия турадиган ($3.77) смартфоннинг сотилишини эълон қилиб, катта қизиқиш ва гап-сўзларга сабаб бўлган эди. Ўз навбатида, унинг смартфонларини сотиб олиш бўйича электрон буюртма берувчиларнинг миқдори ҳам ҳаддан зиёд ошиб кетган.

Маълум бўлишича, дилер Ringing Bells’га 3 миллион дона смартфон учун пул тўлаган ва гаджетларнинг бир қисми етказиб берилган. 1.4 миллион рупиялик маҳсулот олиб, қолган қисмини талаб қилган буюртмачига Ringing Bells компанияси асосчиси таҳдид қилиб, полицияга мурожаат қилса уни оиласи билан бирга йўқ қилишини айтган.

Полициянинг хабар беришича, буюртмачи телефонларнинг кўпчилигида техник носозликлар мавжудлигини ҳам маълум қилган.