BlackBerry 2016 йилда 3 миллион дона смартфон сотишни кўзламоқда
BlackBerry ўтган йилнинг 4-молиявий чорагида 600 минг дона мобиль телефон аппарати сотганини эълон қилди. Бу эса олдинги йилги мазкур чоракдаги кўрсаткичдан 100 минг донага кам дегани.
Wall Street журнали компаниянинг Android тизимидаги смартфонларни сотувга чиқарганини инобатга олиб, жорий йилда 850 мингта BlackBerry смартфонлари сотилишини башорат қилган эди.
BlackBerry компанияси мазкур чоракда $238 миллион доллар зиён кўрган. Компания иқтисодий қийин вазиятдан чиқиб кетиши учун 2016 йилда камида 3 миллион дона гаджет сотиши керак бўлади. Компаниянинг бор умиди эса янги андроид смартфондан.
Аммо, BlackBerry’нинг Google’га қарашли, кенг тарқалган Android мобиль операцион тизимдаги смартфонни сотувга чиқаргани компания нуфузига путур етказган ва бу савдога жиддий таъсир кўрсатиши мумкин.
2015 йилнинг октябрь ойида Android операцион тизимида фаолият кўрсатувчи, 5.4 дюймли BlackBerry Priv смартфони $700 доллардан сотувга чиқарилган эди. AMOLED технологиясидаги сенсор экран, 18 МП бош камера, 3 ГБ тезкор хотирада ишлайдиган Snapdragon 808 процессори, 3410 мА соат аккумуляторга эга смартфон халқаро бозорда мустаҳкам ўринга эга Samsung’нинг $700 долларлик Galaxy S7 ҳамда LG’нинг G5 (тахминан $630дан $690 долларгача) каби мобиль алоқа воситалари билан рақобатга киришган.
Ички жиҳат ва имкониятлари рақиблариники билан деярли фарқ қилмайдиган BlackBerry Priv’нинг хавфсизлик тизими нисбатан юқорилиги билан ажралиб туради.
