Бу смартфон кўл тубида 2 ҳафта ётганидан сўнг ҳам ишлайверди!

Айрим смартфонларнинг корпуслари турли ҳимоя стандартларига кўра муҳофаза этилган бўлади. Лекин амалда-чи, улар қийин шароитларда «жон сақлай» оладими?

ЎҚИНГ: Сенсация: LG G6 бир сутка муз ичида «жон сақлади»!

iPhone Hacks сайтининг ёзишича, шу кунларда қизиқ воқеа кузатилган: нақ икки ҳафта сув остида қолиб кетган iPhone X яна ишлаб кетган!

Келинг, бир бошдан бошласак: YouTube’даги видеоблогер – «Man + River» канали муаллифи сув тубини видеотасвирга тушириб юради. Аниқроғи – у турли йўқолган нарсаларни сув остидан излаш йўналишида видеолавҳалар тайёрлаб, ўз каналига жойлаб боради.

Шунақа лавҳалардан навбатдагисини тайёрлаш жараёнида у кўлнинг тубида ётган кумушранг iPhone X смартфонини топиб олади. Кейинроқ маълум бўлишича, ўша ерда у икки ҳафтадан буён ётган бўлган. Видеоблогер айфоннинг тўлиқ қуришини уч кун кутади, сўнг эса уни ёқса – ишлаб кетади!

ЎҚИНГ: Смартфон сувга тушиб кетди. Энди нима қиламиз?

Видеоблогер смартфоннинг эгаси Алиса исмли қиз эканини аниқлайди ва унга қўнғироқ қилиб, бу топилма ҳақида хабар беради. Смартфони топилганини айтишганида, Алисанинг қалби ҳам қувонч, ҳам ҳайратга тўлади – ундан умидини узиб бўлган экан. Айфони ҳамон ишлаётганини эшитиб эса баттар ёқасини ушлайди – ахир, iPhone X икки ҳафта сув тагида «жон сақлаб» қолишидан умид қилиш ҳам қийин-да! Айтишига қараганда, девайснинг хотирасида Алисанинг болалик суратлари ҳам сақланаётган экан; уларнинг омон қолганига қувонганини айтмайсизми...

Мана, ушбу воқеа ҳақидаги видеолавҳани бирга кўрамиз:

Таъкидлаш керакки, iPhone X моделининг корпуси IP67 стандартига кўра сув ва чанг киришидан муҳофаза этилган. Бу шуни англатадики, мазкур қурилма бир метргача чуқурликдаги сув тагида 30 дақиқагача турганида ҳам ўз иш қобилиятини йўқотмайди. Лекин ярим ой кўл тубида ётиб ҳам яна ишлаб кетиши – кутилмаган ҳолат.

ЎҚИНГ: Сув ва чангдан қўрқмайдиган, кўп функцияли Ulefone Armor X смартфонини 120 долларга олинг! (+видео)