Diginnos Stick DG-STK3 Pro – компьютер-брелок

Яқинда сотувга чиқарилган Diginnos Stick DG-STK3 Pro жуда  ҳам ихчам ўлчамларга эга бўлиб, HDMI порт орқали уни монитор ёки телевизорга улаш мумкин. Бундай қурилма, айниқса, ноутбукни кўтариб юришга эринадиган фойдаланувчиларга манзур бўлиши аниқ.

Қурилмага Bay Trail авлодидаги Atom Z3735F процессори ўрнатилган. Мазкур чип номинал частотаси 1,33 ГГц бўлган тўртта ҳисоблаш ядроларига эга. Шунингдек,  Intel HD Graphics русумидаги график адаптер ҳам ўрнатилган.

Компьютер-брелок 2 ГБ тезкор хотира билан таъминланган. Қурилмада 32 ГБ доимий хотира мавжуд, аммо microSD ёрдамида хотира сиғимини яна ошириш мумкин. Бундан ташқари, митти компьютерда Wi-Fi 802.11b/g/n, Bluetooth 4.0 модуллари, USB 2.0 ва Micro-USB портлари кўзда тутилган. У Windows 10 Pro операцион тизимида ишлайди. Энг қизиғи компьютер-брелок бор-йўғи 40 грамм вазн босади, холос.

Diginnos Stick DG-STK3 Pro 140 АҚШ доллари нархида сотувга чиқарилган.