E3 – янги ўйинлар тақдим қилинадиган дунёдаги энг катта тадбирларидан бирининг бу йилги сони бекор қилинди
Гейминг оламидаги энг катта тадбирларнинг бири, ҳар йили бўлиб ўтадиган E3 (Electronic Entertainment Expo) 2019 йилдан бери илк марта офлайн тарзда қайта ташкилланиши кутилаётган эди, лекин сўнгги хабарларга кўра у бекор қилинган.
Маълум бўлишича, унинг қолдирилишига бўлажак тадбирнинг "саноат ҳажми, кучи ва таъсирини кўрсатадиган тарзда амалга ошириш учун зарур бўлган доимий қизиқиш" йиға олмаганлиги сабаб бўлган.
Таъкидлаш жоизки, январ ойида IGN нашри Microsoft, Nintendo ва Sony компаниялари E3 кўргазмасида қатнашмасликларини хабар қилган эди. Феврал ойида Ubisoft, март ойига келиб эса, Sega ва Tencent компаниялари ҳам бу йилги E3 сонида қатнашмасликлари маълум бўлган.
E3 кўргазмаси 2023 йилнинг 13-16 июн кунлари бўлиб ўтиши ва бу кўргазманинг 2019 йилдан кейин ўтказиладиган илк офлайн тадбири бўлиши кутилаётган эди. Айтиш керакки, 2020 йили E3 Covid-19 сабаб бекор қилинган эди. 2021 йилда E3 онлайн тарзда бўлиб ўтган. 2022 йилда эса тадбирни кейинги йили жонли ўтказиш ниятида бекор қилинган эди.
Бироқ, умидни узишга ҳали эрта, чунки ReedPop ва ESA ҳали яна келажакда E3 тадбирларини қайта ташкиллаш учун бирга ишлашларини маълум қилишган.
E3 ўрнини боса оладиган гейминг тадбирлари
E3 нинг бекор қилиниши ҳаммаси тугади дегани эмас. Айтиш керакки, E3 дан ташқари кўриш керак бўлган эътиборли ўйин тадбирлари ҳали олдинда. Масалан, 2021 йилда Elden Ring, 2022 йилда эса The Last of Us ўйинларининг илк геймплей трейлерлари каби "бомба янгиликлар" билан 2020 йилдан бери журналист Жефф Кейли томонидан ўтказиб келинаётган Summer Game Fest тадбирининг бу йилги сони йилнинг энг катта тадбирларидан бири бўлиши ваъда қилинмоқда. У 8 июн куни бўлиб ўтади.
Summer Game Fest'дан бир неча кун ўтиб, 11 июнда эса Microsoft ўзининг Xbox Games кўргазмасини ўтказиш ниятида. Унда сиз Starfield ўйини геймплейи, Overwatch 2 ўйинининг бепул бўлиши ва Hollow Knight: Silksong ўйинини Xbox учун намойиш қилиниши каби эксклюзив янгиликлар билан танишишингиз мумкин.
12 июн куни эса Ubisoft ҳам ўзининг Forward Live тадбирини ўтказиши кутилмоқда. Унда қайси ўйинлар намойиш қилиниши ҳозирча номаълум, лекин янги Assassin's Creed ўйини ва Prince of Persia: Sands of Time'нинг анчадан бери чўзиб келинаётган қайта ишланган версияси ҳақида янгиликлар бўлиши эҳтимолдан ҳоли эмас.
