Эксклюзив: Samsung энди арзонроқ Galaxy Note чиқарадими?
Galaxy S ва Note серияларини бирлаштириш, Galaxy Note'ни Galaxy Fold билан алмаштириш ўрнига Samsung'дагилар ўрта тоифадан сал юқори турувчи арзонроқ Note смартфони устида ишлаётган бўлиши мумкинми?
SamMobile сайти инсайдери Абҳижит М. нинг ёзишича, ундаги энг сўнгги маълумотларга қараганда, Samsung ҳозиргача чиқарган смартфон моделлари категориясининг ҳеч бирига мос келмайдиган модель рақами SM-N770F бўлган смартфон устида ишламоқда.
Айни дамда, фақатгина Galaxy Note серияси смартфонларининг модель рақами N ҳарфи билан бошланиб, уларнинг барчасида модель рақами SM-N9xx диапозонида бўлади. Инсайдер SM-N770F'ни флагман бўлмаган Note смартфони деб тахмин қилишига сабаб шуки, Samsung кейинги йили ҳамёнбоп букламафон чиқаради ва унинг модель рақами SM-F700F бўлади. SM-F900F модель рақамига эга Galaxy Fold'нинг ҳамёнбоп талқини SM-F700F чиқарилаётган экан, Galaxy Note'лар билан ҳам худди шундай йўл тутилиши мумкин эмасми?
Яна бир жиҳат эътиборга молик. 2014 йилда Galaxy Note 3'нинг арзонроқ талқини, Galaxy Note 3 Neo (SM-N750F), тақдим қилинган. Бундан чиқди, Note'ларнинг арзонроқ талқини олдин ҳам бўлган.
Кўпчиликка ёқадиган S Pen'ли смартфонни арзон нархда тақдим қилиш тўғри қарор бўлади, чунки бу билан Samsung умуман Galaxy смартфонидан фойдаланмайдиганларни ҳам ўзига жалб қилиб олиши мумкин.
Лекин буларнинг бари фақат тахмин бўлиб, Samsung аслида қандай йўл тутаётганини билиш учун бизга кўпроқ маълумот керак бўлади. Ҳозирча бизда бор ягона маълумот шуки, SM-N770F'нинг доимий хотира сиғими 128ГБ бўлади. Бу борада изланишга ва топилган барча маълумотларни сиз билан баҳам кўришга ҳаракат қиламиз.
