Энг хавфли кибер-ўғри қўлга олинди
Полиция вакилларининг сўзларига кўра, Испанияда Денис К. номли шахс бошчилигидаги товламачилар гуруҳи қўлга олинган. Улар хакерлик йўли билан 40 дан зиёд мамлакатларнинг 100 дан ошиқ банкларидан пул ўғирлашда айбланмоқда.
Мадридда бу бўйича Испания Ички ишлар вазири Хуан Игнасио Сойдо иштирокида алоҳида матбуот анжумани ташкил қилинди.
Вазирнинг қайд этишича, гап жаҳоннинг энг хавфли кибер-жиноятчиси ҳақида кетмоқда. Тутқич бермас бу хакерни Европа полицияси анча йиллардан бери қўлга тушира олмаётган эди.
Испаниялик ҳуқуқни муҳофаза қилиш органларининг қайд этишларича, украиналик хакерлар 40 та давлатнинг 100 дан зиёд банкларини онлайн усулда ўмаришган.
Жиноий гуруҳ ҳар куни 1.5 миллион еврогача пулларни ўғирлашга муваффақ бўлган. Анжуманда таъкидланишича, мазкур жиноий гуруҳнинг жаҳон давлатларининг иқтисодиётига етказган зарари камига 1 миллиард евродан ошади. Шу билан бирга, бу рақам 10 миллард еврогача ҳам бўлиши мумкин.
Аҳамиятли жиҳати бу ўғриларнинг асосий диққат-эътибори Россия банкларига қаратилган ва уларнинг бош қурбонлари ҳам Россия ҳудудида жойлашган. Шу билан бирга, Европа ва АҚШ банкларидан ҳам катта миқдордаги пуллар ўғирлаб келинган. Мутахассисларнинг фикрига кўра, Россия банкларининг хавфсизлик тизимлари эскиргани ва талабга жавоб бермаслиги боис, уларни бузиб кириш осон.
Испания кибер полицияси хакерлар гуруҳини тутиш учун уч йил мобайнида махсус операцияни амалга оширди. Бунда Интерпол ҳамда АҚШ ФҚБ мутахассислари ҳам жалб этилганлар.
Айни пайтда қамоқда сақланаётган 34 ёшли Денис К. Испаниянинг Аликанте шаҳрида яшаб келган ва мақсадини амалга оширган.
Украиналик хакер томонидан ишлаб чиқарилган махсс дастурлар унга банкларнинг компьютер тармоқлари ҳамда молиявий тизимларини бузиб киришга ёрдам берган. Ўғирланган пуллар унинг 15 дан зиёд ҳамтовоқларининг ҳисоб рақамларига тушиб турган.
