Facebook F8: Цукерберг ҳаётимизни ўзгартирувчи инновацияларни баён қилди
Facebook ҳар йили дастурчиларни виртуал ривожланишнинг янги тенденциялари билан таништириш учун F8 анжуманини ўтказади.
Компания раҳбари Марк Цукерберг тўлдирилган воқелик технологиясини ривожлантириш ва татбиқ қилиш бўйича 3 та бош режасини баён қилди. Маркнинг фикрича, ушбу технология истиқболи унда маълумотлар бериш тизимини, виртуал объектларни ҳамда реал объектлар (мисол учун, инсонларнинг юз кўриниши)ни такомиллаштиришни татбиқ этилиши билан чамбарчас боғлиқ.
Facebook’нинг тўлдирилган воқелик технологияси виртуал буюмларни реал ҳаёт билан уйғунлаштириш имконини яратади. Мисол учун, унинг ёрдамида уйдаги музлаткичда оила аъзоларига виртуал хабар ёзиб қолдириш, ишхонада ҳамкасбларга топшириқлар қолдириш мумкин. Бу эса ортиқча қоғоз ёки бошқа ресурслардан камроқ фойдаланишга сабаб бўлади.
“SLAM” (параллел намоён бўлиш) технологияси реал ҳаётда стол устига виртуал тўрни ёйиш ва унда шахмат-шашка, бошқа ўйинларни ўйнашга шароит яратиб беради. Цукербергнинг фикрича, истиқболда тўлдирилган воқелик туфайли ён-атрофимиздаги жамики бўшлиқ маъно касб эта бошлайди.
Facebook асосчиси қўшимча воқелик технологиясини ривожлантиришга астойдил киришган кўринади. У мазкур инновацияга мўлжалланган махсус AR-иловалар платформасининг ташкил қилинганини маълум қилди. Camera иловаси мазкур платформадаги илк иловалар сирасига киради.
Бу илова видео ва суратларни ўртоқлашиш имкониятини кенгайтиради. Яқин вақт орасида илова фойдаланувчиларга Facebook ичида тўлдирилган воқелик технологиясини синаб кўриш имконини беради. Аниқроғи, виртуал-шлемни кийиш орқали сизнинг атрофингизда кўнгил очиш ва маълумотлар олиш мумкин бўлган виртуал олам пайдо бўлади.
Шунингдек, Цукерберг VR-технологияси бўйича ҳам тўхталиб, яқин келажакда Facebook ижтимоий тармоғининг тўлиқ виртуал воқелик платформасида ишлайдиган талқинини яратишини маълум қилди. Facebook Spaces деб ном оладиган платформага кириш учун фойдаланувчиларда Oculus Rift ёки Touch виртуал воқелик кўзойнаклари бўлиши керак бўлади.
Маълум қилинишича, Facebook Messenger фойдаланувчилари сони 1.2 млрд. нафарга етган ва бу тармоқда 100 минг ботлар юритилмоқда. Шунингдек, бу мессенжер платформаси Spotify хизматига уланган бўлиб, фойдаланувчилар чатнинг ўзида мусиқани тўғридан-тўғри тинглашлари мумкин.
Шунингдек, шу кунларда Apple Music хизматини ҳам Facebook Messenger’га уланиши кутилмоқда. Цукерберг мазкур платформада ўйинларнинг жорий қилиниши хусусида ҳам тўхталган. Компания раҳбари барча дастурчиларни юқоридаги технология ҳамда платформага мўлжалланган контент ва иловалар яратишга чорлади.
