Galaxy C9 Pro: улкан экран ва йирик “оперативка” уйғунлашган смартфон
Samsung 2011 йилдаёқ биринчилардан бўлиб катта экранли смартфонлар туркуми бўлган Galaxy Note гаджетларини сотувга чиқарган эди. У вақтда бу каби экранлар кўзга ниҳоятда қўпол туйилган. Лекин орадан шунча йил ўтиб, айни пайтда кўряпмизки, катта экран мобил алоқа воситаларининг замонавий тенденциясига айланди.
Samsung 2016 йилнинг октябр ойидан бошлаб улкан экранли смартфон ишқибозлари учун 6,3 дюймли Galaxy Mega ҳамда 6 дюймли Galaxy C9 Pro смартфонларини тайёрламоқда. Куни кеча компания Galaxy C9 Pro смартфонидаги хавфсизлик тизимини янгилади. Android 6.0.1 Marshmallow операцион тизимидаги “C900FDDU1AQC32” рақамли янгиланиш, шунингдек смартфоннинг фаолиятини ҳам яхшилайди. Бунинг учун “Созламалар-> тизимни янгилаш” амалини бажаринг.
Samsung Galaxy C9 Pro’нинг муҳим жиҳатларига тўхталадиган бўлсак, диагонали 6,0 дюйм бўлган дисплей матрицаси Super AMOLED ва сиғими 1920×1080 пиксел. Смартфонга 4 ядроли, ўртача 1,95 ГГц частотата тезлигида ишлайдиган Qualcomm Snapdragon 653 процессори, Adreno 510 видеокартаси ўрнатилган.
Samsung Galaxy C9 Pro’нинг оператив хотираси 6 Гб, доимий хотираси 64 Гб. Шунингдек, microSD қўшимча хотира бўлмачаси ҳам мавжуд.
Унинг 16 мегапикселли бош камераси гибрид автофокус тизими ва 2 тусли светодиодга эга фоточақноқ билан таъминланган. Суратни олиш сифати эса юқоридан бир оз паст. Қизиғи, унинг олд камераси ҳам 16 МП.
Samsung Galaxy C9 Pro’да олинган сурат намунаси.
2 сим-картали смартфон алоқанинг VoLTE, Wi-Fi 802.11ac, Bluetooth 4.2, NFC, A-GPS, USB-C тармоқларида фаолият кўрсатади.
Samsung Galaxy C9 Pro стерео, яъни корпуснинг қуйи ва том қисмларида динамикларга, бармоқ излари сканери ва FM-радиога эга.
Гаджетнинг батарея сиғими 4000 мА•соат. Quick Charge 2.0 тезкор қувватлаш технологиясига эга.
Кўп айтиладиган камчиликлари:
– Сув ва чангга чидамли бўлмаган корпуси;
– Заряд вақтида қизиб кетиши;
– Кераксиз дастурларнинг кўплиги.
Умуман олганда, C9 Pro – металл корпусли ажойиб смартфон. У қўлингизда бўлса, планшетга ҳам эҳтиёж сезмайсиз. Юртимизда Samsung Galaxy C9 Pro ўртача 500 АҚШ доллари баҳосида сотилмоқда.
